ՅՈՒՆԵՍԿՕ-ի գլխավոր տնօրենի ընտրություններն արդեն առանց ադրբեջանական «սոխակի»

Ռուսաստանում Ադրբեջանի դեսպան Փոլադ Բյուբյուլօղլին դուրս է եկել ՄԱԿ-ի Մշակութային հիմնադրամի՝ ՅՈւՆԵՍԿՕ-ի գլխավոր տնօրենի պաշտոնի համար հետագա ընտրապայքարից: Այդ մասին հաղորդում է APA լրատվական գործակալությունը՝ վկայակոչելով Բյուբյուլօղլիի տարածած հայտարարությունը: Հայտարարությունում ՅՈւՆԵՍԿՕ-ի ղեկավարի արդեն նախկին թեկնածուն շնորհակալություն է հայտնում Ադրբեջանի կառավարությանը և նախագահին՝ իր նկատմամբ ցուցաբերած «բարձր վստահության և աջակցության համար», և պնդում է, թե ընտրարշավի ժամանակ հիմքեր ունեին հաջողություն ակնկալելու: Սակայն «հաղթանակի համար անհրաժեշտ 30 ձայների համար բարձր մրցակցային պայքարի ընթացքում, որին Ադրբեջանից բացի մասնակցում էին այնպիսի խոշոր պետություններ, ինչպիսին են Չինաստանը, Ֆրանսիան, Եգիպտոսը, ընդամենը՝ 8 պետություն, ներառյալ ՄԱԿ-ի Անվտանգության խորհրդի երկու մշտական անդամներ, մեզ, ցավոք, չհաջողվեց զարգացնել նախընտրական արշավի հաջողությունը և հավաքել անհրաժեշտ թվով ձայներ», - ասված է Բյուլբյուլօղլիի հայտարարությունում: Քվեարկության հաջորդ փուլը տեղի կունենա այսօր՝ հոկտեմբերի 11-ին: Սպասվում է, որ ՅՈւՆԵՍԿՕ-ի նոր ղեկավարի անունը հայտնի կդառնա մինչև հոկտեմբերի 13-ը: