«Ինչ խոսքեր էլ ու ինչ մակարդակում էլ լինի, չի աշխատելու». Վարդան Բոստանջյան

Այսօր Հայելի ակումբում Ազգային ժողովի «Ծառուկյան» դաշինքի պատգամավոր Վարդան Բոստանջյանը կարծիք հայտնեց, որ Հայաստանում նկատվող թանկացումներն ունեն և՛ օբյեկտիվ, և՛ սուբյեկտիվ պատճառներ: Նշեց, որ տարիներ շարունակ տնտեսական մրցակցություն ՀՀ-ում չի եղել, և այդ տատանումներն էլ հենց բերում են գնաճի, իսկ մրցակցության բացակայության պայմաններում մոնոպոլ նկրտումները և օլիգոպոլ ցանկությունները գերակայում են, և այս պարագան բերում է մի շարք բացասական հետևանքների, մասնավորապես, պետության նկատմամբ պարտավորությունների թերակատարում, փոքր և միջին գործարարության սահմանափակում, և այլն Ինչ վերաբերում է Կառավարության ներդրումային քաղաքականությանը,  ապա նկատեց. «Ներդրումների ինստիտուտն այն է, երբ կապիտալը դնում ես գործունեությունն ընդարձակելու, ծավալելու, ֆիզիակական անձանց նկատմամբ վստահության հարցը տվյալ գործառույթի մեջ չի մտնում: Ցանկացած ներդրումային ակտիվությունն ուղղակորեն պայմանավորված է լինում նրանով, որ իմանա, որ ռիսկերը գրեթե զրոյի են հավասարվում, իսկ երբ դու տեսնում ես, որ ռիսկերի հավանակությունը մեծ է, արդեն ինչ խոսքեր էլ ու ինչ մակարդակում էլ լինի, չի աշխատելու»: Լրագրողի հարցին՝ գոնե ինչ-որ չափով ստվերի վերացում չե՞ք տեսնում,  Բոստանջյանը պատասխանեց, թե ստվերի կրճատումը բոլոր պարագաներում չի կարող հավերժական գործընթաց լինել . «Ակնհայտորեն ստվերը նահանջում է մեր երկրում, որքանով էլ պայմանավորված լինի մեկ անձով, սա պրոցես է, որը ժամանակի ընթացքում չէր կարող մնալ ու մեծանալ, ստվերային տնտեսության որոշակի սահմանափակում կա, բայց դեռևս այնքան փոքր է, որ նկատելի ազդեցություն չունի մեր երկրի քաղաքացիների վրա»: