Ինչու՞ Փաշինյանի թիմը որոշեց փչացնել դատավոր Դավիթ Բալայանին

Երևանի առաջին ատյանի ընդհանուր իրավասության քրեական դատարանի դատավոր Դավիթ Բալայանը բարձր վարկանիշ ունեցող դատավորներից էր համարվում: Նա այն դատավորն էր, որ 2019-ին, երբ Նիկոլ Փաշինյանը հրահանգեց շրջափակել դատարանները, որպեսզի պատժի իր հրահանգները չկատարող դատավորներին, փորձում էր լուսամուտով մտնել աշխատասենյակ՝ դրանով իր անհամաձայնությունը հայտնելով Փաշինյանի որոշմանը: Սակայն երեկ Դավիթ Բալայանը իր ողջ հեղինակությունը ջուրը լցրեց, քծնելով ՔՊ-ականներին, մտածելով, որ իր այդ քայլով կկարողանա ընտրվել ՍԴ-ի անդամ: Պարզ է, որ նախապես իրենց հանդիպման ժամանակ, Բալայանին թվացել էր, թե լեզու էր գտել ՔՊ-ականների հետ, և ուրեմն՝նրան հեշտությամբ կնտրեն ՍԴ անդամ:

Սակայն պարզվեց, որ ՔՊ-ն որոշել էր հրապարակավ փչացնել 2019-ին իրենց թրի տակով չանցած դատավորին, որպեսզի բոլորի համար պարզ լինի, թե ինչ կլինի նրանց հետ, ովքեր իրենց հետ բավարար չափով չեն կարողանում լեզու գտնել:

Բացի այդ, ՔՊ-ն իր այս քայլով մեսիջ է ուղարկում դատավորների համայնքին, թե ինչ «չափանիշների» պետք է համապատասխանեն դատավորները, որպեսզի կարողանան աշխատել իրենց ղեկավարած պետական ինստիտուտներում: ՔՊ-ն մտովի սեփականաշնորհել է այդ ինստիտուտները, համարելով, որ ով որ իշխանության է, նա էլ պիտի տիրանա այդ ինստիտուտներին: Այսպիսով ՔՊ-ն իր այս քայլով փորձում է երկու նապաստակ «խփել»: Նախ, հրապարակավ ցույց է տալիս հանրությանը, որ «սկզբունքային դատավորներ Հայաստանում չկան և չեն կարող լինել», և երկրորդը՝ իրենք ակնկալում են, որ հաջորդիվ դատավորների միությունը ավելի «լոյալ» դատավոր կներկայացնի ԱԺ-ին ՝ ՍԴ-ի անդամ ընտրվելու համար:

Երկրում քաղաքական դաշտի գրեթե բացակայության պարագայում՝ Փաշինյանի թիմի նման պահվածքը հասկանալի է:

Այդ հանրությունը պիտի մտածի այն խնդրի շուրջ, թե ինչպես հնարավոր կլինի վերականգնել երկրում քաղաքական համակարգը, որպեսզի առնվազն սանձի իշխանության նման լկտի պահվածքը:
Սա է իրականությունը:

Դավիթ Մկրտչյան
Zham.am