Արա Աբրահամյանի պատասխան քայլը Ռուսաստանին

Ռուսաստանի հայերի միության նախագահ, Եվրասիական գործընկերության համաժողովի նախաձեռնող Արա Աբրահամյանը, ում միջոցներով այսօր՝ 7 տարվա աշխատանքներից հետո, բացվեց Սուրբ Խաչ ուղղափառ եկեղեցին տեղեկացրեց, որ սա թվով 9-րդ եկեղեցին է, որ կառուցում է: «Հիմա ես Ամերիկայի հայկական եկեղեցին եմ կառուցում, պետք է նա վերջացնել, ընթացքում է, այնտեղ հիմա հաճախակի եմ լինում։ Իմ տան դիմաց էլի կառուցում եմ եկեղեցի, բայց իմ համար, այնտեղ մի քիչ ավելի մեծ է՝ 9-ը 12-ի վրա»։ Արա Աբրահամյանի համոզմամբ՝ ռուսական ուղղափառ եկեղեցի կառուցելը պատասխան քայլ Ռուսաստանին. «Ռուսաստանի իշխանությունները բոլորն ընդառաջում են, հող են հատկացնում, միջոցներ են հատկացնում, հարկերից հանում են, որպեսզի մենք կարողանանք կառուցել ոչ միայն եկեղեցի, այլև՝ եկեղեցուն կից դպրոց, մշակույթի դպրոց, որպեսզի մենք կարողանանք պահպանել մեր լեզուն, մեր սովորությունները, մեր «տրադիցիան», մեր կուլտուրան։ Շատ կարևոր է, որ մենք էլ ցույց ենք տալիս մեր եղբայրական մոտեցումը ռուս ժողովրդին, որ մենք էլ կարողանում ենք ինչ-որ բան կառուցել և իրենց նվիրել»։ Այնուհետև լրագրողները հարց ուղղեցին ՀՀ վարչապետ Կարեն Կարապետյանի գործունեության մասին և հետաքրքրվեցին, թե ում է տեսնում վարչապետ 2018 թվականից հետո: Ի պատասխան Արա Աբրահամյանը նշեց. «Մենք օտար երկրի քաղաքացի ենք, ի՞նչ գործ ունենք այնտեղից ասենք, թե իրենք էստեղ ինչ անեն, ոնց անեն: Մենք ցանկանում ենք նրանց, ովքեր ղեկավարում են, ում հայ ժողովուրդն ընտրել է»: