Ազգակցական կապերն, այո, որոշիչ դեր են խաղում իմ կայացման համար․ Սերգեյ Սմբատյանը «մատ» արեց լրագրողին

Դիրիժոր Սերգեյ Սմբատյանն այսօր լրագրողներին ուրախալի լուր հայտնեց՝ նշելով նաև , որ շատ ոգևորված է, որ փառատոնը մեկնարկում է լեգենդար դերասան, սցենարիստ, պրոդյուսեր, ռեժիսոր Ջոն Մալկովիչի մասնակցությամբ։ «Հայաստանում ելույթ կունենա Ջոն Մալկովիչը։ Շատ լուրջ աշխատել ենք այդ պրոեկտի վրա, որի պրեմիերան եղել է Սեուլում, երկու տարի առաջ։ Շատ ուրախ եմ, որ այն կլինի փառատոնում։ Փառատոնին կմասնակցեն շատ լուրջ, պոպուլյար, կարեւոր արտիստներ, որոնք աշխարհի համար կարեւոր են»,- ասաց դիրիժորը։ Երբ նա ներկայացնում էր հետագա անելիքները, նախատեսված փառատոնի շրջանակում սպասվելիք ելույթները, լրագրողներից մեկը սկսեց սադրիչ հարցեր հղել նրան: Նա նախ նախատեց Սմբատյանին ուշանալու համար, հետո նշեց, որ վերջինս չէր կայանա, եթե չլիներ նրա հայրը:  «Առանց ձեր հոր աջակցության չէիք կայանա եւ չէիք հասնի նման հաջողությունների», - ասաց նա:   Սերգեյ Սմբատյանն ի պատասխան նշեց. «Ինչ են խոսում՝ չգիտեմ։ Ձեր հարցն ավելի գեղարվեստական է, քան կարող է իրեն թույլ տալ չորրորդ իշխանությունը։ Այո, դրանք որոշիչ դեր են խաղում իմ կայացման համար որպես դիրիժոր։ Եթե դրանք չլինեին, ապա չէր լինի այս ամենն, ինչ որ կա։ Ձեր հարցն այնքան էմոցիոնալ հետաքրքիր է, որ երկար դիսկուրսի թեմա է։ Ես կարծում եմ, որ դրա մեջ կա իրականություն։ Դուք եթե կարծում եք, որ այդպես է, ես պետք է հարգեմ Ձեր կարծիքը՝ թույլ տվեք չմեկնաբանել»,- ասաց դիրիժորը։