Հարութի կապերը, փող հայթայթելու կարողությունը շատ բան կարող են փոխել.Ռոման Բալայան

Հայաստանի կինեմատոգրաֆիստների միության դահլիճում շարունակվում է ստեղծագործական միության արտահերթ համագումարը, որը պետք է ընտրի միության նախագահին: Թեկնածուները 3-ն են՝ կինոռեժիսորներ Հարություն Խաչատրյան, Վահե Գևորգյանց և կինոպրոդյուսեր Գևորգ Գևորգյան: ՀՀ քաղաքացի, բայց ԱՄՆ-ում բնակվող դերասան եւ ռեժիսոր Ժան Նշանյանն առաջարկեց, որ քվեարկելու իրավունք ունենան նաեւ արտասահմանում ապրող ՀՀ քաղաքացի միության անդամները: «Ժամանակին Ռոստրոպովիչին մեկ ձայնի պատճառով այդպես զրկեցին ու հեռացրին Ռուսաստանին»,- փաստեց նա: Ճանաչված կինոռեժիսոր Ռոման Բալայանն էլ նշեց. «Ռուբիկ Գեւորգյանցի շնորհիվ ես հայտնվեցի կինոյում, նրա կորուստը մեծ ցավ է ինձ համար… Բոլորին էլ հարգելով, ես եւս Հարութի օգտին պետք է խոսեմ, որովհետեւ ագահ օլիգարխական երկրում կարողանալ փառատոն կազմակերպելը, հերոսություն է, Հարութը հասել է նրան, որ մեզ գովում են ոչ հայերը»: «Հարութի կապերը գումար հայթայթելու, կազմակերպչական ունակությունները կարող են շատ բան փոխել կինոմիությունում…Ես հիշում եմ, թե ինչպես նրա «Կոնդը» գլխավոր մրցանակ ստացավ Կիեւում, ու այդ օրվանից ես հետեւում եմ նրան: Վստահեցնում եմ հետխորհրդային տարածքում «Ոսկե ծիրանի» մակարդակի փառատոն չկա: Առաջարկում եմ քվեարկեք նրա օգտին: Ես 77 տարեկան եմ, մի բան գիտեմ, որ ասում եմ»,ասաց նա: