ԱՄՆ նախագահի դերը աղետներից ու ողբերգություններից հետո/տեսանյութ/
Գլխավոր հրամանատարն ԱՄՆ-ում երբեմն ստիպված է լինում դառնալ գլխավոր սփոփող: Այսօր այս դերն է ստանձնել նախագահ Դոնալդ Թրամփը, հատկապես Լաս Վեգասում իրականացված սպանդից հետո: Այստեղ նա փորձում էր սփոփել վիրավորներին: Գովեստի խոսքեր էր ասում նրանց հասցեին, ովքեր հրազենային հարձակումից հետո հասան օգնության: «Մենք միասնաբար ենք կրելու բոլորիս վիշտը: Դուք միայնակ չեք: Մենք երբեք ձեզ միայնակ չենք թողնի»,- ըստ «Ամերիկայի ձայնի»՝ հայտարարել է Թրամփը: Դրանից մեկ օր առաջ էր Թրամփը մեկնել Պուերտո Ռիկո, որն ավելի վաղ ենթարկվել էր հզոր ծովամրրկի արհավիրքին: «Այստեղ իրականացված աշխատանքը հեռու չէ հրաշքներից»,- հայտարարում էր նախագահը: Թրամփը հետեւում է իր նախորդների օրինակին, ովքեր աղետներից հետո գալիս են սփոփելու ժողովրդին: Հիշենք Բիլ Քլինթընին 1995 թվականին Օքլահոմայում իրականացված ռումբային հարձակումից հետո: «Դուք չեք կորցրել Ամերիկան, քանի որ մենք միշտ ենք կանգնած լինելու ձեր կողքին»,- հայտարարել է նա: Ջորջ Բուշը 2001-ի ահաբեկչական հարձակումներից հետո խոստանում էր. «Մենք չենք հոգնելու, չենք երերալու ու չենք ձախողվելու» Հիշենք 2015 թվականին Հարավային Քարոլինայում սեւամորթների եկեղեցում ռասայական դրդապատճառներով իրականացված սպանդից հետո Բարաք Օբամայի բանաստեղծական խոսքերը`վերցված հայտնի երգի տողերից, որոնք նա ներկայացրեց` երգելով: «Զարմանալի շնորհ, որքան քաղցր է հնչում այն»: Ներկա նախագահ Թրամփի քննադատները հորդորում են նրան արդեն հրաժարվել մարտական դիրքերից ու իրոք զբաղվել համախմբելու աշխատանքներով: Երրորդ ուղի անվանումը կրող կազմակերպության ներկայացուցիչ Ջիմ Քեսսլերի խոսքերով, «Ներկա նախագահն այսօր իրեն ավելի լավ է զգում բաժանարար գործունեությամբ: Նրան թվում է, թե դա անձամբ օգնում է իրեն ու օգնում ամրապնդելու քաղաքական իր դիրքերը: Հիշենք, որ այդ եղանակով էր, որ նա հաղթեց ընտրություններում»: Իսկ թե ինչպես է Թրամփին հաջողվելու համախմբելու կամ տարանջատելու եղանակով ամրապնդել կամ թուլացնել քաղաքական իր դիրքերը, առաջինը ցույց կտա հարկային բարեփոխումներ անցկացնելու գործընթացում նրա որդեգրած կեցվածքը:
Հետևեք մեզ Viber-ում
