Ռուբեն Հայրապետյանի մեղքի բաժինը բացարձակ չեմ տեսնում.Հրայր Թովմասյան

«Ցավալի է մեր հավաքականին նման վիճակում տեսնել, հույս ունեմ, որ արդեն 2020 թ. Եվրոպայի առաջնության ընտրական փուլում թիմն ավելի հաջող հանդես կգա: Այս անհաջողություններում ես բացարձակ չեմ տեսնում Ռուբեն Հայրապետյանի մեղքի բաժինը: Մենք մտերիմներ ենք, ընկերներ ենք: Եթե դուք շփվեք նրա հետ, տեսնեք, թե ինչ սրտացավությամբ է նա անում իր աշխատանքը, որքան ծանր է տանում մեր թիմի պարտությունները, կհասկանաք, թե ինչու եմ այսպես մտածում»,- այսօր ԱԺ-ում լրագրողների հետ զրույցում հայտարարեց ՀՀԿ-ական պատգամավոր Հրայր Թովմասյանը` մեկնաբանելով Հայաստանի ֆուտբոլի ազգային հավաքականի վերջին անհաջողությունները, որ աշխարհի 2018թ. առաջնության ընտրական փուլում անցկացված 9 հանդիպումներից 7-ում պարտություն է գրանցել: Հրայր Թովմասյանը չհամաձայնեց այն դիտարկմանը, թե ՀՖՖ նախագահի փոփոխությունը կարող է փոխել իրավիճակը: Նրա խոսքով՝ ավելի կարևոր է, որպեսզի կարողանանք դրսի առաջնություններում հանդես եկող ֆուտբոլիստների բերել հավաքական: «Միգուցե մարզիչը մտածել էր նոր խաղացողների դաշտ մտցնել, որպեսզի մոտիվացիա լիներ, քանի որ խմբից դուրս գալու շանսեր այլևս չկային: Առաջին խաղակեսի երկրորդ հատվածում և երկրորդ խաղակեսի սկզբում որոշակի ձեռագիր կար, բայց դա բավարար չէր այդ ամբողջը իրականացնելու համար: Պիտի հուսանք, որ Եվրոպայի առաջնության նախնական փուլում մենք շատ ավելի կազմակերպված կլինենք»,- ասաց ԱԺ ՀՀԿ-ական պատգամավոր Հրայր Թովմասյանը։