Սուր շնչառական հիվանդությունների դեպքերի աճ է գրանցվել.Արա Ասոյան

Վերջին շրջանում դպրոցներում և մանկապարտեզներում սուր շնչառական հիվանդությունների կտրուկ աճ է գրանցվել, բայց իրավիճակը վերահսկելի է: Այս մասին այսօր կայացած մամուլի ասուլիսի ժամանակ ասաց Նորքի Ինֆեկցիոն կլինիկական հիվանդանոցի տնօրեն, ՀՀ առողջապահության նախարարության գլխավոր ինֆեկցիոնիստ Արա Ասոյանը: «Սուր շնչառական հիվանդությունների բավական մեծ քանակով դեպքեր են գրանցվել: Սակայն այս շնչառական հիվանդությունը գրիպ չէ: Գրիպին բնորոշ է շատ ավելի ծանր ընթացք»,- ասաց Արա Ասոյանն ու հավելեց, որ սուր շնչառական հիվանդությունների նման սրացում ամեն տարի այս եղանակին լինում է: Ինֆեկցիոնիստի խոսքով՝ սուր շնչառական վարակներն ավելի շատ հանդիպում են երեխաների դեպքում: Հիվանդությունը տարածվում է դպրոցներում և մանկապարտեզներում, որտեղ երեխաների շփումը շատ է: Հիվանդությունն արտահայտվում է ջերմությամբ, հազով, քթահոսությամբ, երբեմն նաև անգինայով: Ապաքինման համար անհրաժեշտ է 3-4 օր: Գլխավոր ինֆեկցիոնիստը բոլոր քաղաքացիներին հորդորում է երեխայի մոտ հիվանդություն հայտնաբերելու դեպքում դիմել տեղամասային կլինիկա, որևէ դեպք պետք չէ թաքցնել, որովհետև դա բարդացնում է աշխատանքը: Ասոյանը նշեց, որ չի կարող հստակ վիճակագրություն ներկայացնել, քանի որ թվերն իրական պատկերը չեն արտահայտում։ Նա միայն տեղեկացրեց, որ Նորքի Ինֆեկցիոն կլինիկական հիվանդանոց օրական միջինում 8-10 երեխա է դիմում: Ասոյանի խոսքով՝ այժմ տարածված սուր շնչառական վիրուսը օդակաթիլային ճանապարհով փոխանցվող է և դժվար է խուսափել դրանից. «Խուսափելու համար պետք է հիվանդ երեխային դպրոց կամ մանկապարտեզ չուղարկեն, որովհետև հենց դպրոցներն ու մանկապարտեզներն են այդ հիվանդությունը տարածողը: Կարծում եմ՝ աշնանային արձակուրդը կազդի չտարածման վրա»,- ասաց նա: Նախորդ տարվա նույն ժամանակի համեմատ հիվանդացության աճ գրեթե չկա: Իրավիճակը վերահսկելի է: Դպրոցներում հոկտեմբերի երկրորդ կեսից սկսվելու են աշնանային արձակուրդները, ինչը ևս կնպաստի վարակի հնարավորինս քիչ տարածմանը: Թեև սուր շնչառական վարակներն օդակաթիլային ճանապարհով տարածվող հիվանդություններ են, և դրանցից խուսափելը դժվար է, այնուամենայնիվ, Ասոյանը խորհուրդ տվեց որոշակի քայլեր ձեռնարկել վարակի տարածումը կանխելու նպատակով: Ինչ վերաբերում է մարզերում ջրծաղիկի ավելացման դեպքերին, Արա Ասոյանը նշեց, որ արդեն 7 տարի է Հայաստանում ջրծաղիկ հիվանդությունը կա՝ ոչ միայն մարզերում, այլ նաև Երևանում, բայց այժմ սարսափեցնող թվեր չկան: Ըստ նրա՝ այս շրջանում տարածված հիվանդություններից հատկապես զգույշ պետք է լինեն երեխաները, տարեցները և խրոնիկական հիվանդություն ունեցող մարդիկ, որոնք ավելի ծանր են տանում հիվանդությունները: Սոնա Դավթյան