Վիգեն Սարգսյանը՝ բանակի բացերի մասին
Այսօր ԱԺ-կառավարություն հարցուպատասխանի ժամանակ «Ելքի» պատգամավոր Մանե Թանդիլյանը ՊՆ նախարար Վիգեն Սարգսյանին հարցրեց՝ ինչպե՞ս է պատկերացնում ազգ-բանակ հայեցակարգի իրականացումը: Նա հիշեցրեց, որ մարտական գործողությունների մասնակցած երիտասարդների գրքույկներում գրառումներ չեն կատարվում, որպեսզի արտոնությունից չօգտվեն, առաջին անհրաժեշտության հիգիենայի պարագաները գնում են զինվորի ընտանիքի անդամները: Չկա այդպիսի ընտանիք, որն ունի զինվոր եւ այդ պարագաները չեն մատակարարվում ընտանիքի կողմից: «Ծառայության ժամանակ ձեռք բերված հիվանդությունները ամբողջական բուժում չեն ստանում: Նմանատիպ խնդիրները ե՞րբ եք պատրաստվում լուծել, որ այն ծրագրերը, որոնք ներկայացնում եք, հանրության կողմից ընդունված լինեն»,- ասաց Թանդիլյանը: Վ. Սարգսյանն ասաց, որ այդ խնդիրն ի հայտ գալուն պես՝ իրենց կողմից տարածվեց հայտարարություն, և ՊՆ-ի թեժ գիծն անհատական դիմումներ ընդունելով՝ գնացել է տարբեր դեպքերի հետևից, հատ-հատ նայելով դիմումները. «Բազմաթիվ դեպքերի պարագայում անճշտությունը հայտնաբերվել է 1 տասնյակից ոչ ավելի: Յուրաքանչյուր պարագայում ուղղում է կատարվել այդ գրքույկներում: Միևնույն ժամանակ, որպեսզի դա չառաջացնի բացասական ընկալում, բոլոր այն տղաներին, որոնք ապրիլյան քառօրյային եղել են մարտական հերթապահություն իրականացնող զորմասում, միայն այդ հիմքով նույն արտոնությունները տրվել են Հայաստանի երիտասարդական հիմնադրամի ծրագրի միջոցով: Այդտեղ քայլ արել ենք ու շարունակելու ենք անել»: Ըստ նախարարի՝ բոլոր այդ երիտասարդներն օգտվում են կրթության համար նախատեսված արտոնություններից և նշեց, որ անպայման կնայեն բոլոր գործերը: «Ինչ վերաբերվում է հիգիենիկ պարագաներին, ապա յուրաքանչյուր զինծառայող ամսական ստանում է գումար՝ իր համար անհրաժեշտ հիգիենիկ պարագաներ գնելու համար: Դա գնում է զորամասի կողքին գտնվող խանութներից: Շատ հնարավոր է, որ տնից էլ են ուղարկում, մենք ամեն ինչ անում ենք, որ դրա կարիքը չլինի: Եթե չի հերիքում, շատ վատ է, պատրաստ ենք յուրաքանչյուր դեպք ուսումնասիրել»: Անձի առողջական վիճակի հետ կապված նախարարն ասաց, որ կոնկրետ դեպք է եւ չպետք է հրապարակայնացնել:
Հետևեք մեզ Viber-ում
