«Ապրիլյան պատերազմի զոհերի մի մասը չեն ենթարկվել հրամանին, դիրքերից հետ չեն քաշվել, որպեսզի խփեն թուրքական ստորաբաժանումներին». Վովա Վարդանով

Այսօր լրագրողների հետ հանդիպման ժամանակ առաջին հետախուզադիվերսիոն ջոկատի հիմնադիր, հրամանատար Վովա Վարդանովն ասաց, որ մոտիվացիան այնքան բարձր է, որ մարդիկ նույնիսկ պատրաստ են հրաման խախտելով՝ հակառակորդի դեմն առնել: Ըստ նրա՝ հանրությունը չի գիտակցում այն փաստը, որ լավագույն պաշտպանության ձևը հարձակումն է: «2016 թվականի ապրիլյան զոհերի մի մասը չեն ենթարկվել հրամանին, դիրքերից հետ չեն քաշվել, որպեսզի խփեն թուրքական ստորաբաժանումներին: Սակայն մենք չենք հասկանում այն փաստը, որ լավագույն պաշտպանության ձևը հարձակումն է: Եթե դա սկսենք հասկանալ, պաշտպանական դոկտրինից հեռանանք ու սկսենք հարձակողական գործողություններ մշակել, զորախաղերում ավելի շատ հարձակվողականին ուշադրություն դարձնենք, մենք ավելի պաշտպանված կլինենք»,- ասաց նա: Վովա Վարդանովի համոզմամբ՝ մեր բանակի դոկտրինը պաշտպանական է, հարձակվողական գործողություններ շատ քիչ են մշակում, ու ցանկացած զինվոր պատրաստ չէ հարձակվողական մարտերին: «Որերո՞րդ մեր նախագահն է ասում՝ քիչ խոսեք 20 տոկոսի կորուստի մասին ու ագրեսիայի դրսևորումներ արեք, որովհետև մի օր կարթնանանք, կլինի 25-30 տոկոս: Ես գոնե հիշում եմ, որ դա ասել է Ռոբերտ Քոչարյանը, ու հիմա՝ Սարգսյանը»,- հարցադրում արեց հետախուզադիվերսիոն ջոկատի հիմնադիրը՝ նշելով, որ բացի զինվորից՝ հարձակվողական մարտերին պետք է պատրաստ լինի նաև հասարակությունը: