Գագիկ Ծառուկյանը Վարդան Ղուկասյանի վրա ճնշում է՞ գործադրել
ԱԺ «Ծառուկյան» դաշինք խմբակցության պատգամավոր Իվետա Տոնոյանն այսօր խորհրդարանում լրագրողների հետ զրույցում անդրադարձավ մամուլի հրապարակումներին, ըստ որի՝ Գագիկ Ծառուկյանը բարկացել է խմբակցության այն պատգամավորների վրա, որոնք դիմել են ԱԺ՝ Երևանում բնակարան վարձակալելու համար ամսական 100 հազար դրամ ստանալու նպատակով: «Պարոն Ծառուկյանի հետ այդ թեմայով խոսելու հնարավորություն չի եղել, նա գործուղման է արտերկիր։ Ինչ վերաբերում է կոնկրետ մեր պատգամավորների հետ կապված այդ հարցին, ապա կուզենայի իմ գործընկերների ուշադրությունը հրավիրել այլ խմբակցությունների, այլ կուսակցությունների ներկայացուցիչների գործողություններին, որոնք ևս օգտվում են վարձով բնակարանի հնարավորությունից», - ասաց Տոնոյանը։ Նա ասաց, որ Վարդան Ղուկասյանը դեռևս 8 օր առաջ դիմումը հետ է վերցրել: «Կոնկրետ մեր խմբակցության դեպքում այսպես հետևողականորեն շեշտվում է Վարդան Ղուկասյանի, Վարդևան Գրիգորյանի անունները: Վարդևան Գրիգորյանն ընդհանրապես չի դիմել փոխհատուցման համար: Նաև Կարինե Պողոսյանը դիմել ու վերցրել է»,- ասաց Իվետա Տոնոյանը: Հարցին, թե Վարդան Ղուկասյանի վրա Ծառուկյանի կողմից ճնշում է եղե՞լ, որ դիմումը հետ է վերցրել, նա պատասխանեց. «Բնականաբար, ոչ»:
Հետևեք մեզ Viber-ում
