Փրկարարներն ու ճանապարհային ոստիկանները Դիլիջանի 5-րդ ոլորանից հատուկ տեխնիկայի միջոցով դուրս են բերել այնտեղ հայտնված Opel-ը

Երեկ՝ հոկտեմբերի 2-ին, ավտովթար է տեղի ունեցել Տավուշի մարզում։ Ժամը 12։20-ի սահմաններում 34-ամյա Արամ Սարգսյանը իր վարած Opel Astra G մակնիշի 34 AN 194 համարանիշի ավտոմեքենայով Երևան-Իջևան ավտոճանապարհի Դիլիջանի 5-րդ ոլորանում դուրս է եկել ճանապարհի երթևեկելի գոտուց և սահելով հայտնվել ձորակում։ Ինչպես հայտնում է ֆոտոլրագրող Գագիկ Շամշյանը, բարեբախտաբար, զոհեր և վիրավորներ չկան։ Օպերատիվորեն դեպքի վայր են ժամանել Արտակարգ իրավիճակների նախարարության Փրկարար ծառայության թիվ 63 հրշեջ-փրկարարական ջոկատը, ովքեր Ճանապարհային Ոստիկանության 2-րդ սպայական գումարտակի 4-րդ վաշտի 2-րդ դասակի տեսուչներ Աշոտ Մարկոսյանի և Դավիթ Հովհաննիսյանի հետ համատեղ քարշակի միջոցով դուրս են բերել ավտոմեքենան երթևեկելի գոտի։ Փրկարարները հոսանքազրկել են ավտոմեքենան, փակել գազի բալոնի փականը, քանի որ առկա է եղել գազի արտահոսք։ ՃՈ տեսուչներ Ա. Մարկոսյանն ու Դ. Հովհաննիսյանն էլ մինչ փրկարարների ժամանումը տեղանքում կատարել են ուժեղացված ծառայություն, որպեսզի հետաքրքրասեր վարորդների կողմից ճանապարհը չխցանվի։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: