Ձեր Սերժ Սարգսյանի հետ միասին այսպիսով լուսաճաճանչափայլ քայլերով քայլում եք դեպի ժողովրդավարությո՞ւն.Փաշինյան

ԱԺ հերթական նիստին այսօր «Երեւանի ՏԻՄ մասին» օրենքում փոփոխություններ կատարելու մասին նախագծի` 2-րդ ընթերցմամբ քննարկմանը Ելք խմբակցության ղեկավար Նիկոլ Փաշինյանն իր ելույթում, անդրադառնալով հնչած ելույթներին, իր զարմանքը հայտնեց ՀՀԿ-ական պատգամավորների այն խոսքերի վերաբերյալ, թե ընդդիմությանը բազմաթիվ լիազորություններ է տրված, ու հիմա` այդ նախագծի հետ կապված, պարտադիր չէ, որ ընդդիմությունը անցկացնի իր առաջարկը: Նիկոլ Փաշինյանն ասաց, թե իր համար զավեշտալի է, որ ԱԺ Հանրապետական խմբակցության պատգամավոր Շիրակ Թորոսյանն ասում է, թե 1/3-րդ-ով հնարավոր է նիստ անել։ «Այս դահլիճում քանի անգամ է մեկ երրորդով արտահերթ նիստ հրավիրվել։ Էդ Հանրապետական մեծամասնությունը ի՞նչ էր անում այդ արտահերթ նիստերը, բոյկոտում էր։ Էդ մեկ երրորդով նիստերը չէին կայանում։ Հիմա էլ եկել եք ասում եք՝ մեկ-երկու անդամ ունեցող խմբակցությունը ո՞նց կարող է հանրաքվե նախաձեռնել։ Էդ Ընտրական օրենսգիրքը դուք եք մշակել, ընդունել, ընենց անեիք, որ էդ խմբակցությունը 50-60 հոգանոց լիներ», - դիմելով Թորոսյանին ու մեծամասնությանը՝ հայտարարեց Փաշինյանը։ «Բնականոն ընթացքի մասին ձեր պատկերացումը ո՞րն ա, որ հարցեր կա՞ն՝ չկան, դեմ կա՞, չկա։ Կողմ՝ բոլորը, միաձայն։ Ամեն ինչ լավ ա, չաղ ու բախտավոր, ողջ ըլնենք, օջախի կենանցը, էս ա՞ ձեր բնականոն գործունեության մասին պատկերացումը։ Եթե էս ա, ճիշտ ճանապարհ եք ընտրել՝ խմբակցությանը զրկեք ձայնի իրավունքից, պատգամավորին զրկեք իրավունքից, ավագանու անդամին զրկեք իրավունքից։ Վերջում էլ ասեք, որ Երևանի ավագանի ու Ազգային ժողով մուտք ունենալը ցույց է տալիս, որ  Ձեր Սերժ Սարգսյանի հետ միասին այսպիսով լուսաճաճանչափայլ քայլերով քայլում եք դեպի ժողովրդավարությո՞ւն։ Ձե՞ռ եք առնում»,- հայտարարեց Փաշինյանը։