Ջավախքի հայաբնակ Գումբուրդո գյուղում սպասում են Վրաստանի Ներքին գործերի նախարարին

Ջավախքի հայաբնակ Գումբուրդո գյուղում բախումներ են տեղի ունեցել Վրաստանի ոստիկանության հատուկ նշանակության գումարտակի ծառայողների և հայերի միջև: Պատճառն այն է, որ տեղի իշխանությունները թույլ չեն տվել հայերին 10-րդ դարի եկեղեցու բակում խաչքար տեղադրել: Բախումների արդյունքում վիրավորներ կան: Ախալքալակի հոսպիտալում են չորս վիրավոր ոստիկան, նրանց վիճակը ծանր է գնահատվում, իսկ վիրավոր բնակիչները չեն դիմել բժիշկների օգնությանը: Վիրավորների թվում է պատգամավոր Մկրտիչ Մղդեսյանը: Դեռևս հայտնի չէ, թե գյուղաի բնակիչներից որքան մարդ է վիրավորվել բախումների արդյունքում:Վնասվածքներն առաջացել են հիմնականում քարեր նետելու արդյունքում, հրազենային վիրավորում ոչ ոք չի ստացել: Վրաստանի ներքին գործերի նախարար Գեորգի Մգեբրիշվիլին ճանապարհվել է միջադեպի վայր: Դեպքի վայր ժամանած հատուկ նշանակության զորքերի հետ բախումների ընթացքում ձերբակալվել է գյուղի երկու բնակիչ: Նախնական տվյալներով՝ բախումների հետևանքով վիրավորվել են գյուղի բնակիչներ, ինչպես նաև մի քանի ոստիկան: Ինչպես բնակիչներին հայտնել է Վրաստանի խորհրդարանի պատգամավոր Սամվել Մանուկյանը և խորհրդարանի նախկին պատգամավոր և այժմ Ախալքալաքի քաղաքապետի թեկնածու Սամվել Պետրոսյանը, դեպքի վայր ժամանած ներքին գործերի նախարար Գեորգի Մգեբրիշվիլիի հետ բանակցությունների ընթացքում տեղացիները պայմանավորվել են, որ ձերբակալվածները կազատվեն, հատուկ նշանակության ջոկատները կհեռանան և բնակիչները նույնպես կհեռանան տներ: Տարածքում կմնան տեղի ոստիկանները: Բնակիչները հայտնել են, որ չեն հեռանա տարածքից մինչև ձերբակալվածները չժամանեն այդտեղ:     Aliq.ge