Վանաձորում թալանել են «Սանուս Դենտ» կլինիկայի տնօրենի տունը

Shamshyan.com-ը հայտնում է. Հայաստանի քննչական կոմիտեի Լոռու մարզային քննչական վարչությունում հարուցվել է քրեական գործ՝ բնակարանային գողության փաստով։ Երեկ՝ սեպտեմբերի 29-ին, Ոստիկանության Տարոնի բաժին է դիմել Վանաձոր քաղաքի Տարոն-2 թաղամասի բնակիչ՝ 34-ամյա Հովհաննես Ուռուսյանը և հայտնել, որ սեպտեմբերի 28-ի ժամը 16։00-ից մինչև սեպտեմբերի 29-ի ժամը 23։30-ն ընկած ժամանակահատվածում անհայտ անձը կամ անձինք իր տան 1-ին հարկի ննջասենյակի պատուհանը բացելու միջոցով ներս են մտել տուն և այնտեղից գողություն կատարել։ Պարզվել է, որ բնակարանից գողացել են «Սամսունգ գալաքսի» ֆիրմայի պլանշետ, «Սամսունգ» ֆիրմայի հեռուստացույց, «Ֆիջուս» ֆիրմայի համակարգչի մոնիտոր, արծվի տեսքով կերամիկայից պատրաստված արձան, ոսկեգույն մետաղական մոմակալ, փղի տեսքով կերամիկայից պատրաստված 2 հատ արձան, հնաոճ հեռախոս (անտիկվար), «Ռոլեքս» ֆիրմայի ժամացույց, ինչպես նաև կանացի դրամապանակ, որի մեջ եղել է 1 մլն 900 հազար դրամ։ Ընդհանուր առմամբ՝ ստահակը կամ ստահակները Հ. Ուռուսյանին պատճառել են 2 մլն 800 հազար դրամի վնաս։ Գ. Շամշյանի տեղկություններով՝ Հ. Ուռուսյանն աշխատում է «Սանուս Դենտ» կլինիկայի տնօրեն։