Անցում ենք կատարում առողջ եւ ակտիվ ծերացման. Անահիտ Գեւորգյան

ՀՀ աշխատանքի եւ սոցիալական հարցերի նախարարության Տարեցների հիմնահարցերի բաժնի պետ Անահիտ Գեւորգյանն այդսօր լրագրողների հետ հանդիպմանը հիշեցրեց, որ 1990թ. ՄԱԿ-ի Գլխավոր ասամբլեայի որոշմամբ՝ հոկտեմբերի 1-ը սահմանվել է Տարեցների միջազգային օր (International Day of Older Persons): Սկզբնապես այս օրը նշվել է Եվրոպայում, որից հետո տարածվել ԱՄՆ-ում, իսկ 1990-ականների վերջին՝ ամբողջ աշխարհում: Այնուհետև տեղեկացրեց, որ մի քանի տարի տարեցներին մատուցվող ծառայությունների ժամանակ շեշտը դրվում էր միայն խնամքի ծառայությունների վրա, ապա այժմ անցում ենք կատարում առողջ եւ ակտիվ ծերացման, նրանց սոցիալական կյանք ներառելուն, նրանց կարիքների գնահատման հիման վրա մատուցվող այլընտրանքային ծառայությունների տրամադրմանը: Անդրադառնալով սոցիալական աշխատողի աշխատավարձի մասին, նա նշեց, որ նախատեսվում է դեպք վարողներին համապատասխան ռեսուրսներով ապահովում, քանի որ դեպք վարողը չի կարող իր աշխատավարձով առանց տրանսպորտային միջոցների, համակարգչային տեխնիկայի եւ այլնի այցելել համայնքներ։ «Այս տարի ներդրվել է դեպք վարողի ինստիտուտը, որի շրջանակներում Աշխատանքի եւ Սոցիալական հարցերի նախարարության եւ այլ գերատեսչությունների միջեւ կնքվել են համաձայնագրեր, որով հայտնաբերվելու է կարիքավոր տարեցը սոցիալական աշխատողի կողմից, բայց միաժամանակ գտնվելու է կրթության եւ գիտության, առողջապահության, տեղական ինքնակառավարման եւ այլ մարմինների ուշադրության կենտրոնում»,-ասաց նա։