Դաժան ու ողբերգական դեպք Երևանում. 33-ամյա երիտասարդը վրաերթի է ենթարկվել իր իսկ վարած Peugeot-ի կողմից . ՖՈՏՈՌԵՊՈՐՏԱԺ

Այսօր՝ սեպտեմբերի 30-ին, դաժան ու ողբերգական դեպք է տեղի ունեցել Երևանում։ Ժամը 05։00-ի սահմաններում Շենգավիթ վարչական շրջանի Կաշեգործների փողոցի 225 հասցեի դիմաց Արարատի մարզի Նորաշեն գյուղի բնակիչ՝ 33-ամյա Հովհաննես Զոհրաբյանը իր կողմից վարած Peugeot մակնիշի 20 ՏՏ 901 համարանիշի ավտոմեքենան կայանել է դարպասների մոտ և իջել է՝ դարպասները բացելու։ Ինչպես հայտնում է ֆոտոլրագրող Գագիկ Շամշյանը, մինչ նա կբացեր դարպասները, ավտոմեքենան ինքնաբերաբար առաջ է ընթացել և վրաերթի ենթարկել Հ. Զոհրաբյանին։ Վերջինը տեղում մահացել է։ Դեպքի վայր են ժամանել Արտակարգ իրավիճակների նախարարության Փրկարար ծառայության աշխատակիցները։ Ժամանել են նաև Ճանապարհային Ոստիկանության 1-ին սպայական գումարտակի ծառայողները՝ 1-ին հերթափոխի պատասխանատու հերթապահ Տիգրան Խաչատրյանի գլխավորությամբ։ Դեպքի մասին ՃՈ օպերատիվ կառավարման կենտրոնի պատասխանատու հերթապահ Կարեն Հովակիմյանը տեղեկությունը փոխանցել է Հայաստանի քննչական կոմիտեի Երևան քաղաքի քննչական վարչություն, որտեղից ժամանել է հատկապես կարևոր գործերով ավագ քննիչ Անդրանիկ Փարսադանյանը, ում կողմից փաստի առթիվ նյութեր են նախապատրաստվում։ Մահացածի դին ավտոմեքենայի տակից դուրս են բերել փրկարարները։ Դեպքի վայր է ժամանել նաև Ոստիկանության Շենգավիթի բաժնի օպերատիվ խումբը՝ բաժնի պետ Հրաչ Խոստեղյանի գլխավորությամբ։ Գ. Շամշյանի տեղեկություններով՝ մահացածն աշխատում էր «Ալբրիկ Շին» ՍՊԸ-ում՝ որպես չափագրող, ով վերջերս էր նշանվել և առաջիկայում պետք է տեղի ունենար նրա հարսանիքը։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները` Սմբատ Պետրոսյանի