Ինչո՞ւ Արման Թաթոյանը չի այցելում Գասպարիին /տեսանյութ/

Մարդու իրավունքների նորանշանակ պաշտպան Արման Թաթոյանը փետրվարի 25-ին   լրագրողների հետ զրույցում, նշեց, որ հետևողական է լինելու Վարդգես Գասպարիի գործի հետ կապված, քանի որ դա համարում է չափազանց կարևոր: Թաթոյանը տեղեկացրեց, որ Վարդգես Գասպարիի գործով դիմել է ՀՀ գլխավոր դատախազին, որպեսզի քրեական դատավարության օրենսգրքով սահմանված շրջանակներում ընթացքի հարցը լուծվի, քննարկվի: «Վարդգես Գասպարիի գործով դիմել եմ ՀՀ գլխավոր դատախազին, որպեսզի քրեական դատավարության օրենսգրքով սահմանված շրջանակներում ընթացքի հարցը լուծվի, քննարկվի: Դրանից բացի ահազանգ է եղել տեսակցությունների մասով, որով պարզաբանումներ եմ պահանջել արդարադատության նախարարից, նաեւ վատ վերաբերմունքի հետ կապված: Մենք ուսումնասիրել ենք փաստաբանի հրապարակային հայտարարությունը: Քանի որ կալանավորման հարցը դատական վարույթում է գտնվում, որտեղ օրենքն արգելում է ուղիղ միջամտություն»,-ընդգծեց նորանշանակ ՄԻՊ-ը: Թաթոյանի խոսքով` հաշվի առնելով հարցի հնչեղություն ու պատգամավորների արձագանքները, նաեւ գնահատական է տվել՝ կապված փաստաբանների հայտարարության հետ, ազատությունից զրկելու մասով: «Ես նշել եմ, որ անազատության մեջ պահելու հարցը քննարկելիս դա հաշվի կառնվի»,-ասաց նա: Լրագրողի դիտարկմանը, թե փաստաբանների հայտարարությունն ուսումնասիրելու արդյունքում ինչ եզրակացության է եկել, Թաթոյանի պատասխանեց. «Եթե վերցնում ենք վատ վերաբերմունքի հարցը: Ես վատ վերաբերմունք լայն իմաստով եմ ասում, որովհետեւ դրա մեջ մտնում է նաեւ, փաստաբանների պնդմամբ, խոշտանգման դեպքը: Այստեղ այլ հնարավորություն ՄԻՊ-ի մասով չկա, քան համապատասխան հարցում անելը: Բայց ես հարցում չարեցի, այլ միանգամից առաջարկեցի գլխավոր դատախազին, որպեսզի քրեական դատավարության օրենսգրքով ընթացակարգ սկսվի այդ դեպքի կապակցությամբ»: Հարցին, թե ինչու անձամբ չի այցելել Գասպարիին, նա արձագանքեց. «Այցելել է ՄԻՊ-ի արագ արձագանքման խումբը: Անձամբ այցելելու առումով, ֆիզիկապես հասցնելու խնդիրն էր, որովհետեւ առաջին օրն էր: Դուք գիտեք նաեւ, որ երեկոյան բերման են ենթարկվել ակտիվիստներ: Բազմաթիվ գործեր կան, որոնք ունեն անհապաղ կարեւորություն: Եթե ես պատշաճ չաշխատեի բերման ենթարկված ակտիվիստների հետ կապված, արդյունքը չէր լինի: Այնպես որ այցելելու խնդիրը չկա, ես բազմաթիվ անգամներ եմ այցելել»: Աստղիկ Ավագյան