Ուֆուք Ուրասը՝ Արցախ այցելության և ադրբեջանական «սև ցուցակում» հայտնվելու մասին

Սեպտեմբերի 22-ին Արցախ այցելած և Ադրբեջանի պահանջով միջազգային հետախուզման մեջ գտնվող Թուրքիայի 4 քաղաքացիներից թուրք քաղաքական գործիչ Ուֆուք Ուրասը հարցազրույց է տվել Ստամբուլի հայկական պարբերականներից «Ակօսին»: «Երբ հայաստանյան մեր այցի ժամանակ ասացին՝ կցանկանա՞ք տեսնել Արցախը, շատ ոգևորվեցի: Բացառությամբ Հայաստանի ոչ մի երկրի կողմից չճանաչված Արցախի՝ այդ փակ տուփի մեջ ի՞նչ կա՝ ցանկանում էի տեսնել: Մենք անչափ տպավորվել ենք Արցախի ժողովրդի դրական արձագանքից, որոնք Թուրքիայից զբոսաշրջիկների տեսնելով՝ խնդրել են թարգմանչին իրենց շնորհակալությունը փոխանցել նրանց Արցախ հասնելու համար: Մենք չենք ցանկանում այսօր առկա խնդիրները ժառանգություն թողնել մեր թոռներին: Երբ զբոսնում ես Շուշիի Կերպարվեստի պետական թանգարանում ու զմայլվում աննման աշխատանքներով, հասկանում ես. կա մի ուրիշ աշխարհ, որը մենք երբեմն չենք տեսնում: Կարևորը, որ այդ աշխարհը չմնա թանգարանների ներսում միայն», - ասել է Ուրասը: Ուֆուք Ուրասը հարցազրույց է տվել նաև ադրբեջանական ԶԼՄ-ներից մեկին և նշել, որ «սև ցուցակում» հայտնվելն իրեն չի զայրացրել: «Ինչ արած, ուրեմն այդպես էլ պետք է լիներ… Ես չեմ պատրաստվում այն վիճարկել»,- ասել է թուրք քաղաքական գործիչը՝ շեշտելով, որ համաձայն չէ այն կարծիքի հետ, թե Արցախը պատկանում է Ադրբեջանին: Այնուհետև, առաջարկել է հայերին ու ադրբեջանցիներին ապրել Արցախում: Հիշեցնենք, որ սեպտեմբերի 22-ին ԱԺ նախկին պատգամավոր Արագած Ախոյանի կողմից ղեկավարվող «Արևմտահայերի ազգային խորհուրդ» ՀԿ-ի կողմից մի խումբ թուրք հասարակական-քաղաքական և մշակութային գործիչներ այցելել են Արցախ: