Մենք բակում չենք․ նախարարի ու ձկնաբույծների խոսակցությունը լարվեց (video)
Մենք խոսում ենք տարբեր լեզվով. ձկնաբույծների հետ հանդիպմանը հայտարարեց Շրջակա միջավայրի նախարար Հակոբ Սիմիդյանը, ում պնդմամբ՝ ձկնաբույծները համաձայն չեն նորարար գործիք կիրառել ջուրն արդյունավետ կառավարելու համար։
«Նախարարության տեսանկյունից ջուրը առաջնահերթություն ունեցող, ռազմավարական նշանակություն ունեցող ռեսուրս է, և կառավարությունը ոչ թե ձկնաբույծների համար, այլ ՀՀ քաղաքացիների համար ամեն ինչ անելու է, որ ջուրը չվատնվի, իսկ Արարատյան դաշտի ստորգետնյա ջրերը մեր խմելու ջրերի հիմնական ռեսուրսն են»,-ասաց Սիմիդյանը։
Ձկնաբույծներից մեկը տեղից արձագանքեց, թե ձկնաբուծարանները Հայաստանին մեծ գումարներ են բերում, բայց ստացվում է, որ ՀՀ կառավարությունը փորձում է խնայել, փոխարենը հարևան պետություններն ավելի շատ հորեր են բացում։ «Այսինքն՝ այսքան հորը փակում եք՝ ենթադրելով, որ ջուրն ավելանում է, բայց եթե մենք փակում ենք՝ Թուրքիան բացում է, և այդ ջուրը չի ավելանում», - ասաց ձկնաբույծներից մեկը։
«Լրիվ ուրիշ դաշտ եք տանում խոսակցությունը, որը պետք չէ», - նկատեց նախարարը։
Հետևեք մեզ Viber-ում
