Նոր «Միսս Հայաստան» մրցույթ կանցկացվի.Կարեն  Արիստակեսյան

«Միս Հայաստան» գործակալությունը դիմել է դատարան՝ օրերս Հայաստանում անցկացված գեղեցկության մրցույթին,  կազմակերպիչ, նախկին Միս Հայաստան Գոհար Հարությունյանի գործողություններին քրեաիրավական գնահատական տալու համար։ Հայելի ակումբում հրավիրված ասուլիսում «Միս Հայաստան» գործակալության տնօրեն Կարեն  Արիստակեսյանը բարձրաձայնում է, որ օրերս անցկացված մրցույթը մի շարք թերություններ է ունեցել: Նա ընդգծում է, որ կան սահմանված կանոններ, որոնց ազգային մրցույթը պարտադիր պետք է հետեւել: Նախ աղջիկների ֆիզիկական տվյալների՝ հասակի, չափսերի հետ կապված կան խիստ չափանիշներ, որոնց Գոհար Հարությունյանի մրցույթի կազմակերպիչները չեն հետեւել: Բացի այդ՝ «Միսս Հայաստանին» կարող են մասնակցել միայն ՀՀ քաղաքացիները կամ երկքաղաքացիություն ունեցողները: Այս կանոնը եւս չի պահպանվել: «Կամ էլ պետք է «Միսս Արմենիա դիասպորա»/«Միսս Արմենիա սփյուռքը» անունով մրցույթ անցկացվի (այդ ապրանքային նշանների իրաուքնները նույնպես մեզ են պատկանում), որին կկարողանան մասնակցել աշխարհում սփռված հայ գեղեցկուհիներ, որից հետո կարող են մասնակցել «Միսս Հայաստանին»»,- պարզաբանեց Արիստակեսանը: «Միսս Հայաստան» գործակալությունը  պատրաստվում է նոր «Միսս Հայաստան» մրցույթ անցկացնել: Կարեն Արիստակեսյանն անդրադարձավ գեղեցկուհիների ընտրությանը. «Գեղեցկությունը մասնագիտություն չէ, մինչդեռ մանեկենությունը` այո, մեկից մյուսը մեկ քայլ է։ Մրցույթին կարող էին մասնակցել 170 սմ սկսած հասակ ունեցող աղջիկները, այլ ոչ թե 165 սմ սկսած, ինչպես եղավ անցկացված մրցույթին։ Ես չեմ իջնի, քննարկի կամ քննադատի անցկացված մրցույթի մակարդակը։ Միայն ասեմ, որ կարեւոր է բնական գեղեցկությունը, լողազգեստները պետք է միագույն, միատոն լինեն, կոշիկը պետք է լինի 7 սմ, քանի որ դա կույս թիվ է` այլ բաների հետ չկապեք։ Այս չափորոշիչները ես չեմ հնարել, սա տարիներ առաջ նորաձեւության տներն են հորինել, այս դեպքում եւ զգեստը, եւ քայլվածքը գեղեցիկ են դառնում։ ՀՀ-ում չկան նորաձեւության ու նրբագեղության դպրոցներ, որտեղ կսովորեցնեն բարձրակրունկ կոշիկների վրա քայլել։ Սա մենք զգուշացրինք, որ օրենքը չխախտեն, մենք պատրաստ էինք անգամ լիցենզիա տալ»: Պարոն Արիստակեսյանը չբացառեց, որ այս տարի միգուցե հայտարարություն արվի, հավաք արվի` հաջորդ տարի իրենց կողմից մրցույթ անցկացնելու մասին. «Մեր ժամանակ 1000-1200 մարդուց էինք ընտրություն անում, հիմա սերունդը փոխվել է, ավելի գեղեցկացել»։