Ով է Կարեն Բենիամինյանը եւ ում թեկնածուն է իրականում
ՀՀԿ-ն Արտաշատի քաղաքապետի ընտրություններում վերջնական որոշում է կայացրել. նոյեմբերի 5-ին կայանալիք համայնքապետի ընտրություններում Արտաշատում ՀՀԿ թեկնածուն կլինի վարչապետի որոշմամբ համայնքի ղեկավարի պաշտոնակատար նշանակված Կարեն Բենիամինյանը: Նախկին վարչապետ Հովիկ Աբրահամյանի ազդեցության տարածք համարվող այս քաղաքի ղեկավարի պաշտոնի շուրջ քաղաքական շրջանակներում պայքարը հատկապես վերջին տարիներին թեժ է։ Զարմանալիորեն այժմ Աբրահամյանների ձայնը չի լսվում, իսկ առաջադրումներին հաշված օրեր են մնաց, հոկտեմբերի մեկից թեկնածուների հայտերը պետք է ներկայացվեն ու դեռ հայտնի չէ՝ նրանք կունենան իրենց թեկնածուն, թե կպաշտպանեն Կարեն Բենիամինյանին, ով մամուլի տեղեկություններով Արգամ Աբրահամյանի ընկերն է: Ով է հանրությանը ոչ այնքան հայտնի Կարեն Բենիամինյանը եւ ում թեկնածուն եւ ինչ է ասում նրա կենսագրությունը: Բենիամինյանն Արտաշատի ավագանու ՀՀԿ խմբակցության անդամ է, քաղաքապետարանի աշխատակազմում որևէ պաշտոն չի զբաղեցնում։ 2005-2006թթ. Կարեն Բենիամինյանն աշխատել է «Հայռուսգազարդ» ՓԲԸ Արտաշատի ներտնային սպասարկման ծառայությունում` որպես վարպետ: 2006թ-ից` նույն ծառայության պետ: Իսկ ամենակարեւորը՝ նա Արտաշատում հայտնի Գազի Հովոյի՝ Հովհաննես Ղազարյանի սանիկն է: Գազի Հովոյի եւ Աբրահամյանների դարավոր թշնամանքի մասին Արտաշատում գիտեն բոլորը, սակայն Արտաշատի քաղաքապետի վերջին ընտրության ժամանակ Արգամ Աբրահամյանի դեմ առաջադրված միակ թեկնածու Հովհաննես Ղազարյանը ինքնաբացարկի դիմում ներկայացրեց: Կային հավաստի տեղեկություններ, որ այդ ամենը թանկ է արժեցել եւ Ղազարյանի հետ բանակցել է այդ օրերին վարչապետ Հովիկ Աբրահամյանը, դրանից հետո Գազի Հովոյի ավագ որդին նշանակվեց Արտաշատի գազի վարչությա պետ, ինչն էլ համարում էին որպես պայքարից հրաժարվելու ձեռքբերում Սակայն մյուս կողմից՝ Գազի Հովոն քավոր-սանիկ հարաբրություններ ունի Արարատում ոչ պակաս հայտնի Գրիգորյանների հետ, մասնավորապես ԱԺ պատգամավոր Արայիկ Գրիգորյանի սանիկն է, կան շրջանակներ, որ այդ հանգամանքով են են բացատրում Գազի Հովոյի ընտանիքի առաջխաղացումը: Հարկ է նշել, որ Արգամ Աբրահամյանի պաշտոնանակությունից և ԱԺ պատգամավոր ընտրվելուց հետո` ս.թ. ապրիլից մինչ օրս, քաղաքապետի լիազորությունները ժամանակավորապես իրականացնում էր քաղաքապետի տեղակալ Իսահակ Գրիգորյանը։ Սեպտեմբերի 22-ին վարչապետի որոշմամբ Բենիամինյանը դարձավ ժամանակավոր պաշտոնակատար, իսկ Հովիկ Աբրահամյանի ազգական Գագիկ Պողոսյանը երեկ ինքնակամ հրաժարվել է Արտաշատի փոխքաղաքապետի պաշտոնից, որը նա ստանձնել էր Արգամ Աբրահամյանի ժամանակ եւ տեղեկությունների համաձայն նա պետք է դառնար Աբրահամյանների թեկնածուն: Հրաժարականը նշանակում է, որ նա դուրս է գալիս խաղից: Այս ամենը էլ ավելի է խճճում , թե ում թեկնածուն է իրականում Կարեն Բենիամինյանը: Անի Սահակյան
Հետևեք մեզ Viber-ում
