Կառավարության հույսերը

ՀՀ կառավարությունը հաստատեց 2018 թվականի պետական բյուջեի նախագիծը, որը կուղարկի Ազգային ժողով: ՀՀ ֆինանսների նախարար Վարդան Արամյանը նշեց, որ Եկամուտների մասով այն կկազմի 1 տրիլիոն 307 միլիարդ դրամ (2017-ին՝ 1 տրիլիոն 207 միլիարդ դրամ): Ծախսային մասով բյուջեն կկազմի 1 տրիլիոն 464 միլիարդ դրամ (2017-ին՝ 1 տրիլիոն 360 միլիարդ): Դեֆիցիտը կկազմի 157 միլիարդ դրամ՝ 2017 թ. 150 միլիարդի փոխարեն: ՀՆԱ-ի մեջ այն կկազմի 2,7 տոկոս, որի շուրջ 80 միլիարդը ֆինանսավորվելու է արտաքին աղբյուրների հաշվին, մնացածը՝ ներքին աղբյուրների: 2018-ին Հայաստանի բյուջեով կանխատեսվում է 4,5% տնտեսական աճ: Ֆինանսների նախարարն ընդգծեց, որ 2018-ին բարձրացվել են կապիտալ ու պաշտպանական ծախսերը: Կապիտալ ծախսերին կուղղվի 175 միլիարդ դրամ՝ 2017-ի 95 միլիարդի փոխարեն, իսկ պաշտպանության ծախսերին՝ 246,8 միլիարդ  դրամ՝ այս տարվա 209,8 միլիարդի փոխարեն, 37 միլիարդ դրամով ավելի: «Կարծում ենք, որ արդյունաբերությունը կլինի առաջնորդող՝ ակնկալվում է 6,5 տոկոս աճ, գյուղատնտեսությունում էլ դրական աճ ենք ակնկալում՝ առնվազն 4 տոկոս: Դրա հիմքում ընկած են սուբսիդավորման ծրագրերը »,- ասաց Արամյանը: Պետական բյուջեի նախագիծը կքննարկվի Ազգային ժողովում: