Երեւանում 1.5 տարեկան երեխան մահացել է կրկնակի պատվաստման հետեւանքով. Հայկական Ժամանակ

Երեւանում 1.5 տարեկան երեխան այս տարվա հուլիսին մահացել է ԿԿԽ-ի՝ կարմրուկի, կարմրախտի, խոզուկի դեմ պատվաստանյութի կրկնակի ներարկումից: Այս մասին Հայկական Ժամանակը տեղեկացել է ՀՀ քննչական կոմիտեից: Պատասխանելով հարցմանը՝ կոմիտեի նախագահի խորհրդական Սոնա Տռուզյանը հայտնեց. «Նախաքննության ընթացքում ստացվել է փոքրիկի դիակի դատաբժշկական փորձաքննության եզրակացությունը, համաձայն որի, մահվան պատճառ է հանդիսացել ԿԿԽ տեսակի պատվաստանյութի կրկնակի ներարկումը։ Նախաքննության ընթացքում նշանակվել է դատաբժշկական հանձնաժողովային փորձաքննություն, որի եզրակացությունը դեռեւս չի ստացվել»: Անդրադառնալով հարցին, թե ինչ է նշանակում կրկնակի ներարկում, երեխան երկո՞ւ անգամ է պատվաստվել, թե՞ մեկ պատվաստման ընթացքում կրկնակի դոզա է ստացել՝ Սոնա Տռուզյանը մանրամասնեց, որ երեխան ԿԿԽ-ի դեմ արդեն մեկ անգամ պատվաստված է եղել: «Հանձնաժողովային փորձաքննության նշանակումը հենց այդ նպատակն ունի՝ պարզել, թե ում գործողությունների հետեւանքով կամ անգործության պատճառով է, որ փոքրիկը երկրորդ անգամ է պատվաստվել՝ առանց սահմանված ժամկետը լրանալու»,- ասաց նա: 1.5 տարեկան Լենայի հարազատները համոզված էին, որ նա մահացել է դրանից օրեր առաջ ստացած պատվաստման հետեւանքով: Մայրը` Թեհմինե Բաղդասարյանը, մեզ հետ զրույցում պատմել էր, որ դուստրն ատամ հանելու պատճառով վատառողջ էր, հոսպիտալացվել էր, բուժում էր ստանում: Այդ ընթացքում տարածքային պոլիկլինիկայից շարունակ զանգահարել են, ասել, որ պետք է երեխային հերթական պատվաստումը ստանալու տանել: Ինքն անընդհատ մերժել է, բայց ի վերջո տեղի է տվել: «Այնքան զանգահարեցին, երեխային տարա, պատվաստվեց: Բայց պատվաստանյութը ինձ մոտ չեն քաշել ներարկիչի մեջ: Բուժքույրը պատրաստ բերեց, բժիշկը իմ պուճուրիկին սրսկեց: Ասաց` դա յոթ հիվանդության դեմ է: Հետո երեխային բերեցի տուն, երկու օր ամեն ինչ նորմալ էր, ուտում էր, ջուր էր խմում, խաղում էր: Երրորդ օրը տաքությունը բարձրացավ: Երեկոյան զանգահարեցի շտապօգնություն, ասացի պատվաստում են արել, երեխայի տաքությունը բարձրացել է, մի հատ կանչ գրեք: Պատասխանեցին` այդպես պետք է լինի, չենք կարող գալ, կանցնի»,- ողբերգությանը նախորդած իրավիճակը ներկայացրել էր Թեհմինեն: Արդեն լուսադեմին փոքրիկը մոր ձեռքերի մեջ մահացել էր: Դեպքի առթիվ Երեւանի Շենգավիթ վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 130-րդ հոդվածի 2-րդ մասով (Բժշկական օգնություն եւ սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն առաջացրել է հիվանդի մահ): Նախաքննության ընթացքում տուժողի իրավահաջորդ Թեհմինե Բաղդասարյանը ցուցմունք է տվել այն մասին, որ 2017թ. հուլիսի 4-ին դստերը պատվաստման նպատակով տարել է «Բժշկուհի Բադանյան» ՍՊԸ: