Անգելա Մերկելը քվեարկել է Գերմանիայի ընտրություններում

Գերմանիայի քաղաքներում Բունդեսթագի ընտրություններին ժամը 11-ի տվյալներով Համբուրգում քվեարկել է ընտրողների 37,4 տոկոսը: 2013 թվականին այս ցուցանիշը կազմել էր 35,4 տոկոս: Բրեմենում իրենց ձայնն են տվել ընտրողների 27,1 տոկոսը՝ ընդդեմ 24,9 տոկոսի, փոխանցում է DW-ն: Մյունխենում կեսօրին քվեարկել էր ընտրողների 57,1 տոկոսը: Միաժամանակ, Սաքսոնիայում ընտրողների մասնակցությունը կեսօրին համեմատելի էր 2013 թվականի ցուցանիշին, իսկ Թյուրինգիայում այն նույնիսկ ավելի ցածր էր, քան նախորդ ընտրություններում: Գերմանիայի կանցլեր Անգելա Մերկելը ևս մասնակցել է քվեարկությանը: Նա Բեռլինի կենտրոնում տեղակայված ընտրատեղամաս է եկել ամուսնու՝ Յոահիմ Զաուերի ուղեկցությամբ: Մերկելի գլխավոր մրցակից, Գերմանիայի Սոցիալ-դեմոկրատական կուսակցությունից դաշնային կանցլերի պաշտոնի թեկնածու  Մարտին Շուլցը քվեարկել է Վյուրզելեն քաղաքում: