Դուք ընդհանրապես зашкалили. Բագրատյանը՝ Նազարյանին

ԱԺ պատգամավոր Հրանտ Բագրատյանն այսօր խորհրդարանում Հանրային ծառայությունները կարգավորող հանձնաժողովի նախագահ Ռոբերտ Նազարյանին խնդրեց բացատրել, թե ինչո՞ւ է Հայաստանում էլեկտրաէներգիայի սակագինը թանկ: Նա նշեց, որ էլեկտրաէներգիայի միջին սակագինը ՀՀ-ում նախորդ տարվա օգոստոսի մեկի դրությամբ հաստատված էր 48 դրամ, Ուկրաինայում՝12 դրամ, ՌԴ-ում՝ 22 դրամ, Վրաստանւմ՝ 28 դրամ: Ռոբերտ Նազարյանն ասաց, որ Ուկրաինայում պետությունը սուբսիդավորում է էլեկտրաէներգիայի սակագինը, Ռուսաստանում ջերմային կայանների գազի գինը եռակի անգամ ցածր է, քան այն գինը, որով Հայաստանի ջերմային կայաններին է տրամադրվում գազը: «Եկեք վերցնենք Մոլդովան, Կոսովոն, Մակեդոնիան, Ալբանիան, Բուլղարիան, Լիտվան, Էստոնիան, Հունգարիան, կտեսնեք, որ ավելի բարձր են, քան մեր սակագները: Փորձենք հասկանալ՝ մեր մեթոդիկան ինչպիսին է, արդյոք ներառո՞ւմ է միջազգային լավագույն փորձը, կա՞ն խնդիրներ, որ մենք հաշվի չենք առել մեր մեթոդիկայում, փորձենք այդ բացը լրացնել»,- ասաց նա: Բագրատյանը հայտարարեց, որ, Մոլդովայի օրինակն ընդհանրապես տեղին չէր, քանի որ այդ երկրում չկա ատոմակայան. «Դուք լրիվ անհիմն օրինակ բերեցիք: Դուք ընդհանրապես зашкалили, ոնց որ ասում են»: Բագրատյանը նաև հետաքրքրվեց՝ սահմանին գազը Հայաստանի համար 165 դոլար է: Ո՞նց է հաշվված այդ գինը, եթե 2013-ի գազային պայմանագրով նախատեսված էր, որ այդ գինը պետք է թղթակցի ՌԴ Օրենբուրգի մարզի գնի հետ: «Այդ Օրենբուրգի հետ կապվող գազի գինը, որն ամրագրված է 2013 թվականի պայմանագրում, բանաձևն այնտեղ նշված է: Ինչ վերաբերում է 165 դոլար այսօրվա գնին, եթե տեղյակ եք՝ անցած տարի ստորագրվել է մի պայմանագիր, որով միայն 2015 թվականի համար է ֆիքսված հստակ գին Հայաստանի համար: Այնտեղ Օրենբուրգի մասին որևէ բան չի ասում»,- նշեց Ռոբերտ Նազարյանը: