Սամվել Բաբայանի գործով վկան հրաժարվում է իր ցուցմունքներից
Լեռնային Ղարաբաղի պաշտպանության նախկին նախարար Սամվել Բաբայանի գործով դատարանում այսօր ցուցմունք տվող վկա Աշոտ Շուշանյանը հայտարարեց՝ իր նախաքննական ցուցմունքը գրել է քննիչի ճնշումներով ու թելադրանքով։ Ըստ նրա՝ ցուցմունքում տեղ են գտել փաստեր, որոնք իրականությանը չեն համապատասխանում։ Վկա Շուշանյանը, որը ամբաստանյալ Սանասար Գաբրիելյանի ընկերն է, պատմեց՝ երբ Գաբրիելյանին ձերբակալել են, ինքը ՕՐՕ դաշինքի Էջմիածնի պատասխանատու Սուսաննայի օգնությամբ գնացել է Երևան՝ և այդ լուրը հայտնել Սամվել Բաբայանին: Ընդ որում, Շուշանյանի խոսքով, Բաբայանն իրեն հանձնարարել է ջնջել ինչ-որ պլանշետի «միջի եղածը»: Վերջինս, չհասկանալով, թե խոսքը ում կամ ինչի մասին է, միաժամանակ չի փորձել պարզաբանում ստանալ Բաբայանից և դուրս է եկել, իսկ խոսակցությունն այդքանով ավարտվել է: Ավելի ուշ, սակայն, ըստ վկայի, քննիչն իրեն ստիպել է գրել, որ Բաբայանի հետ զրուցել են նաև Ղարաբաղ գնալու և Վրաստանից հրթիռ տեղափոխելու մասին։ «Քննիչը առավոտից իրիկուն դավադիտա արել․․․ ես էլ հիվանդ տղա եմ, կանտուզիա տարած․․․ առավոտից իրիկուն սոված-ծարավ պահելա, ասելա գրի», - պատմեց վկան: - «Եկավ էդ հրթիռը գրելու ժամանակ՝ ասի հրթիռ ես չեմ տեսել, ոչ էլ տեղյակ եմ, գրեմ ինչի՞ համար: Բա՝ հրթիռը գրականա, գրի: Դավադիտ անելուց հետո նադայել ընլնելուց բռնել եմ՝ գրել»: Ըստ մեղադրանքի Սամվել Բաբայանը 50 հազար դոլար է խոստացել այս գործով մեղադրյալ, իր մարտական ընկեր Սանասար Գաբրիելյանին՝ «Իգլա» տեսակի զենիթահրթիռային համալիր ձեռք բերելու համար: Գաբրիելյանն էլ Վրաստանում գործարար կապեր ունեցող Հրաչյա Մայիլյանի միջոցով գտել է զինատեսակը: Դատարանում վկա Աշոտ Շուշանյանը նաև ասաց՝ մինչ ինքը նախաքննական ցուցմունք էր տալիս, քննիչը հաճախ դուրս էր գալիս սենյակից, այնուհետև վերադառնալով՝ իրեն ստիպում գրել այս կամ այն դրվանգի մասին։ «Ամբաստանյալ Սանասար Գաբրիելյանի ձերբակալության պահին մենք միասին ենք եղել», -պատմեց Շուշանյանը։
Սամվել Բաբայանը տեղից հայտարարեց՝ հրթիռի անուն ոչ ոք չի տվել, նման բառ խոսակցության մեջ չկա, դա է ապացուցում նաև ԱԱԾ արած գաղտնի ձայնագրությունը․ - «Տեքստը կա գործի մեջ: Ես հրթիռ բառ չեմ օգտագործել»: Մեղադրող դատախազը միջնորդություն ներկայացրեց հրապարակել այդ ձայնագրության վերծանումը։ Հրապարակված վերծանման մեջ խոսք էր գնում Ղարաբաղ գնալու և ինչ-որ խողովակի՝ «տռուբայի» մասին։ Դատախազի հարցին՝ ինչ «տռուբայի» մասին էր խոսքը, վկան ասաց՝ ես չգիտեմ։ Գործով հաջորդ դատական նիստը երկուշաբթի է՝ սեպտեմբերի 25-ին։
Հետևեք մեզ Viber-ում
