Փոքր տան մեծ կռիվը

ԵԱՏՄ-ից դուրս գալու՝ «Ելք»-ի նախաձեռնությունը հաջողության կարող է հասնել միայն այն դեպքում, եթե դաշինքն այդ ուղղությամբ գործընթացներ ծավալի նաև խորհրդարանից դուրս, եթե հասարակական աջակցությունը դրսևորվի նաև ԱԺ պատերից դուրս, սա թերևս, պարզ է բոլորի համար: Նաև հստակ է, որ նախաձեռնությունը իշխող ՀՀԿ-ի և մյուս խմբակցություններից կողմից հավանության չի արժանանալու, այսինքն, ստացվում է, որ սա առավելապես քաղաքական գործընթաց է, որը ինչպես նկատվում է, ջղաձգորեն է ընդունվում ռուս մեկնաբանների, փորձագետների կողմից, ինչու չէ Հայաստանում ռուսական շահերի սպասարկուների կողմից: Այսինքն, խորհրդարանում ընդամենը 9 պատգամավոր ունեցող «Ելք»-ի նախաձեռնությունը կարող է ազդեցություն ունենալ, եթե այն վայելի հասարակության լայն աջակցությունը և որևէ կերպ այն դրսևորվի: Կկազմակերվի՞ նման գործընթաց դրսում, կստանա այն հասարակության, քաղհասարակության, փորձագետների աջակցությունը, այսինքն` ինչ-որ կազմակերպչական ձև պետք է՞ տրվի դրան: Ներկայացվել է նախագիծ, որը բավական ամուր հիմնավորումներ ունի, թե ինչու պետք է մեր երկիրը դուրս գա ԵԱՏՄ-ից: Մինչդեռ իշխանությունների կողմից արդեն 4 տարի չի հնչել որևէ հիմնավոր գնահատական, չի ներկայացվել որևէ մատչելի վերլուծություն, թե ինչ է շահել ու շահում հայ ձեռներեցը ԵԱՏՄ-ին` մեր երկրի անդամակցությունից և ինչ կկորցնի, եթե չանդամակցենք այդ կառույցին: Եթե միակ արդարացումը Ռուսաստանից ստացվող տրանսֆերտներն են, ապա դա ԵԱՏՄ-ին չանդամակցելու դեպքում էլ ունեինք: Եթե դուրս գանք ԵԱՏՄ-ից` անվտանգության հարցո՞ւմ խոցելի կդառնանք... Իսկ հիմա խոցելի չե՞նք, իսկ անցյալ տարի ապրիլին խոցելի չէ՞ինք... Ավելին` անցած տարիները ցույց տվեցին, որ ԵԱՏՄ-ն այդպես էլ Հայաստանի անվտանգության երաշխավորը չդարձավ, հետևաբար՝ այդ միությունից դուրս գալը, մասնավորապես, ղարաբաղյան հակամարտության հետ կապված՝ վտանգներ չի պարունակում։ Մենք անդամակցեցինք ԵԱՏՄ-ին, բայց դա բացարձակապես չբերեց նրան, որ Ռուսաստանն ազդի Ադրբեջանի վրա և թույլ չտա, որ Ադրբեջանն իր սպառազինությունն օգտագործի կոնկրետ Հայաստանի ու Արցախի դեմ ագրեսիա իրականացնելու համար: Ավելին` Ադրբեջանին զինելու գործընթացն էլ նույն թափով շարունակվում է: Անշուշտ, հարցը ունի քաղաքական շերտ: Հայաստանի իշխանությունները չեն կարող նման գործընթացին համաձայնել, քանի որ դա Ռուսաստանում կդիտարկվի որպես ուղիղ հարված Մոսկվային` թիկունքից: Իսկ սա Հայաստանի համար վտանգավոր զարգացումներով հղի գործընթացի սկիզբ կարող է դառնալ: Դա հասկանում են թե՛ Երևանում, թե՛ Մոսկվայում: Այդ իսկ պատճառով` չնայած հարցի հնչեղությանը, կարևոր քննարկումների ծավալմանն ու բանավեճերի կայացմանը, «Ելքի» նախաձեռնությունը ժամանակի ընթացքում կգնա մարման, թեև այն խիստ կարևոր քննարկում էր: Մետաքսյա Շալունց