Հայաստանի ղեկավարությունը պարբերաբար կրակի վրա յուղ է լցնում․ Լավրով

Հայաստանում կա ոչ կառավարական կազմակերպությունների հզոր լոբբի, որոնք փորձում են խաթարել Ռուսաստանի ազդեցությունը երկրում: ՄԱԿ-ում ելույթին հաջորդած ճեպազրույցի ժամանակ հայտարարել է ՌԴ ԱԳ նախարար Սերգեյ Լավրովը։

«Այն, որ Հայաստանում, ինչպես նաև նախկին Խորհրդային Միության մի շարք այլ երկրներում, ընդհանրապես, կա հզոր լոբբի՝ ներկայացված հասարակական կազմակերպությունների մի շերտով, որը ստեղծված է, այդ թվում՝ արևմտյան բազմաթիվ հիմնադրամների միջոցով, որոնք նպաստում են Միացյալ Նահանգների և նրա դաշնակիցների շահերին, և այդ շահերը Ռուսաստանի ազդեցությունն այնտեղ խաթարելն է, դա փաստ է»,- ասել է Լավրովը։

«Մենք դրան վերաբերվում ենք որպես արհեստականորեն բորբոքված կրքերի, գիտենք, թե ում է դա հետաքրքրում և ով է ղեկավարում: Ցավոք սրտի, Հայաստանի ղեկավարությունը պարբերաբար կրակի վրա յուղ է լցնում»,- հավելել է ՌԴ արտգործնախարարը:

ՌԴ ԱԳ նախարարի խոսքով՝ Մոսկվան համոզված է, որ հայ ժողովուրդը այլ տեսակետ ունի։

«Մենք համոզված ենք, որ հայ ժողովուրդը հիշում է մեր ընդհանուր պատմությունը, իսկ իր պատմությունը կապում է Ռուսաստանի և այլ բարեկամ երկրների հետ, առաջին հերթին՝ այս տարածաշրջանի երկրների հետ, ոչ թե օվկիանոսից այն կողմ գտնվողների»,- ասել է Սերգեյ Լավրովը։

Դրա հետ մեկտեղ, Լավրովը նշել է, որ ԵՄ-ն եւ ԱՄՆ-ն իրենց ծառայություններն են պարտադրում Երեւանին եւ Բաքվին՝ ապակայունացում բերելով Հարավային Կովկասի տարածաշրջան։

«Այժմ Բրյուսելն իր միջնորդական ծառայությունները պարտադրում է Ադրբեջանին եւ Հայաստանին՝ Վաշինգտոնի հետ ապակայունացում բերելով Հարավային Կովկաս»,-ասել է նա։

Խոսելով Արցախում այս պահին ստեղծված իրավիճակից Լավրովը նշել է, որ ռուս խաղաղապահները կանեն ամեն ինչ՝ օգնելու Լեռնային Ղարաբաղում խաղաղ կյանքի հաստատմանը և այնտեղ վստահության ամրապնդմանը։

«Հիմա, երբ Երևանի և Բաքվի ղեկավարները կարգավորեցին երկու երկրների ինքնիշխանության փոխադարձ ճանաչման հարցը, եկել է խաղաղ կյանքի, դրա հաստատման, վստահության ամրապնդման ժամանակը։ Ռուսական խաղաղապահ զորակազմն ամեն կերպ կնպաստի դրան»,- ասել է Լավրովը։

Անդրադառնալով խաղաղապահների թվին, նա նշել է, որ Լեռնային Ղարաբաղում ռուս խաղաղապահների թիվը որոշվում է՝ ելնելով տեղում տիրող իրավիճակից։ «Նրանք նպաստում են Ղարաբաղի և Բաքվի միջև երկխոսության հաստատմանը»,- ասել է Լավրովը։

«Մեր խաղաղապահներն այժմ օգնում են Ղարաբաղի ներկայացուցիչների և ադրբեջանցի պաշտոնյաների միջև շփումներին։ Խաղաղապահներն այնտեղ ներկա են ՝ ելնելով այն հանգամանքից, որ նրանց դերը կարևոր է վստահության ամրապնդման համար, որպեսզի ղարաբաղցիները հատկապես սկզբնական շրջանում, իրենց ապահով զգան»,- ընդգծել է Լավրովը։

Սերգեյ Լավրովը Նյու Յորքում ասուլիսի ժամանակ անդրադարձել է նաև որոշ հայ քաղաքական գործիչների քննադատությանը:

«Եվ երբ հայ հասարակության մեջ քննարկումներ սկսվեցին ղարաբաղյան խնդրի համատեքստում Ռուսաստանի դերի մասին, Հայաստանի խորհրդարանի նախագահը (Սլեն Սիմոնյանը - խմբ.) չամաչեց հայտարարել, որ Ղարաբաղը ադրբեջանցուն տվել է ՌԴ նախագահ Վլադիմիր Պուտինը դեռ 2020 թվականի նոյեմբերին։ Մինչդեռ 2020 թվականի նոյեմբերի 9–ի եռակողմ համաձայնագրում ասվում էր, որ Ղարաբաղը ՌԴ խաղաղապահների պատասխանատվության գոտին է, և ենթադրվում էր, որ Ղարաբաղի կարգավիճակը հետաձգվում է ու կդիտարկվի ավելի ուշ»,– ասել է նա։

Ըստ ՌԴ արտգործնախարարի` երբ Նիկոլ Փաշինյանը Ադրբեջանի նախագահի հետ Պրահայում (2022 թվականի հոկտեմբերի 6-ին - խմբ.) ստորագրեց փաստաթուղթը` ճանաչելով Ղարաբաղը Ադրբեջանի կազմում, Ռուսաստանին մեղադրելն անընդունելի է։

«Ի դեպ, այդ փաստաթղթում (նկատի ունի Պրահայի հռչակագիրը - խմբ.) նրանք մոռացել են գրել ԼՂ հայերի իրավունքների ապահովման անհրաժեշտության մասին», - նկատել է նախարարը:

Վերադառնալով Մոսկվայի հասցեին հնչող քննադատություններին ՝ Լավրովը վստահեցրել է, որ ռուսական կողմը դրան վերաբերվում է որպես արհեստականորեն սրվող կրքերի։

Zham.am