Անկախությունը սրբազան արժեք է. Արամ Ա
Ն.Ս.Օ.Տ.Տ. Մեծի Տանն Կիլիկիո Արամ Ա կաթողիկոսն այսօր կոչ արեց, որ բոլորը մտածեն, զգացումները կենտրոնացնեն անկախության վրա: «Այսօր ինչի՞ օր է` անկախության օր է: Եկեք բոլորս մեր մտածումները, զգացումները կենտրոնացնենք անկախության վրա և ամրացնենք մեր հայրենիքի անկախությունը: Անկախությունը սրբազան արժեք է, յուրաքանչյուր հայի ձգտումն է, պարտավորությունն է: Մենք, ահավասիկ, ունեցանք ազատ, անկախ Հայաստան: Բոլորս` հայրենաբնակ հայությունը և սփյուռքի մեջ ապրող հայությունը, այնպես պետք է անենք, որ մեր հայրենիքի անկախությունն ավելի հզորանա, ավելի ամրապնդվի: Մեր եկեղեցու հիմնական առաքելությունն է մաս կազմել մեր հայրենիքի անկախությունը: Պատմությանը նայեցեք` մինչև Սարդարապատ. մեր եկեղեցին Սարդարապատ գնաց` կռվելու համար, իր արյունը թափելու համար` վասն հավատո և վասն հայրենյաց: Եկեք ուրեմն այս մանրուքներեն, երբեմն վատառողջ քննադատություններեն, միակողմանի մոտեցումներեն վեր մնանք և միասնաբար, զանազան կերպերով աշխատենք հայրենիքի անկախության ամրապնդման համար: Աստված պահե ձեզ բոլորդ»,- ասաց Վեհափառը:
Հետևեք մեզ Viber-ում
