ԱՀԱԶԱՆԳ․ հ․ 129 դպրոցում ուսուցիչների նկատմամբ տեռոր է

Հարգելի' խմբագրություն,
Երևանի Գայի անվան հ.129 հիմնական դպրոցի աշակերտները առանց պատժի ամենավերջին հայհոյանքներն ու անձնական վիրավորանքներն են հասցնում ուսուցիչներին: Ուսուցիչները խաչակնքվելով են մտնում դասարան: Աշակերտների միջոցով ուսուցիչների հանդեպ իրականացվում է տեռոր:
Ղեկավարները մտնում են դասարաններ և անհարգալից տոնով, դասապրոցեսն ընդհատելով, աշակերտների աչքի առաջ միտումնավոր տարաբնույթ պահանջներ են ներկայացնում ուսուցիչներին:
9-րդ դասարանցիները միաձայն գոռալով անցկացնում են ամբողջ 45-րոպեանոց դասաժամը: Զարհուրելի, ամբողջ թաղամասով մեկ տարածվող աղմուկին զուգընթաց դասարանի առավել ակտիվ տղաները անարգել վազում են նստարանների շուրջը, կռվում միմյանց հետ` ընդհուպ մինչև մարմնական վիրավորանքներ հասցնելը: Վնասում են դասարանի գույքը:
Ուսուցիչների կողմից բազմիցս բարձրաձայնված խնդիրները ոչ միայն չեն լուծվում, այլև, ընդհակառակը, դեռ մի բան էլ ղեկավարությունը մեղադրում է ուսուցիչներին աշակերտների հետ աշխատելու անկարողության մեջ: Առաջը հուր, հետևը սուր:
Շատ կարևոր է իմանալ, որ դպրոցի բարձր դասարաններում նման քաոսային իրավիճակ ստեղծելով` ուսուցիչներին նվաստացնելու գործընթացները կազմակերպվում և իրագործվում է հեռավար կարգով ստացված հանձնարարությունների միջոցով: Սկզբնաղբյուրը և հրահանգները գալիս են Երևանի Պարույր Սևակի 8/2 հասցեից: Ցանկության դեպքում շատ հանգիստ կարելի է ճշտել նամակագրական կապը:
Խնդրում եմ Ձեր ուշադրությունը և աջակցությունը դասավանդող ուսուցիչներին, որոնցից ոմանք իհարկե, հանուն սեփական շահի, կարող են լռել:
Շնորհակալություն:

Մի խումբ քաղաքացիներ