Ձեր մաշկը, ուրիշի մաշկը, ո՞նց տարբերենք. Կարեն Կարապետյան

Այսօր Հայաստան-Սփյուռք 6-րդ համաժողովից հետո Հայաստանի վարչապետ Կարեն Կարապետյանը  լրագրողների հետ զրույցում այն հարցին, թե ինչպես է Կառավարությունը հայտարարում արձանագրված դրական ցուցանիշների մասին, երբ շարքային քաղաքացին իր մաշկի վրա դրական աճ չի զգում, պատասխանեց, ասաց, որ ամեն մեկի մաշկը նման չէ մեկ ուրիշի մաշկին:«Օրինակ, դուք Կառավարության աշխատանքի ինչպիսի՞ գնահատականներով եք կարծիք կազմում: Ձեր մաշկը մի զգացողություն ունի, մեկ ուրիշի մաշկը՝ ուրիշ, ո՞նց ենք տարբերելու: Ամբողջ աշխարհն ընդունել է հայտանիշներ: Մենք այս ամբողջ ամիսը հաշվետվություն ենք տալիս՝ այդ թվում նաև ձեզ: Թե որ քաղաքացիներն են իրենց մաշկի վրա զգացել, որը չէ, շատ սուբյեկտիվ է: Գիտեք մեկի մաշկը մի զգացողություն ունի, մեկ ուրիշինը  այլ զգացողություն ունի: Մենք էլ մեկ ամսվա ընթացքում ներկայացրել ենք հաշվետվություն, ըստ որի լավագույնն ենք  ԵԱՏՄ-ում, ԱՊՀ-ում: Բավարա՞ր է, որ մեր քաղաքացիների խնդիրները լուծենք՝ ոչ: Ի՞նչ ենք մենք արել՝ ապահովել ենք 1,2 տոկոս տնտեսական աճ, 2,7 տոկոս արդյունաբերության աճ, 28,5 տոկոս ներմուծման և 21 տոկոս արտահանման աճ: Բավարար է դա, որ մենք բոլորս լավ զգանք մեզ, իհարկե՝ ոչ: Հնարավոր է , որ մեկ տարվա մեջ մեր պայմանները փոխվի, իհարկե՝ ոչ , այդ իսկ պատճառով մենք ուզում ենք առարկայական խոոսել և ոչ թե էմոցիոնալ: Իսկ մաշկի վրա չենք զգացել՝ շատ սուբյեկտիվ և անչափելի գործոն է»,- հայտարարեց վարչապետը: