Ու՞ր են մեծ մեծ խոսացող հայերը․ ու՞մ է ակնարկում Արա Աբրահամյանը (video)
Այսօր Սփյուռք չկա ոչ միայն Ռուսաստանում, այլեւ մնացած բոլոր տեղերում կապը խզվել է, Հայաստանը զրկվել է հզոր ուժից։ Այս մասին օգոստոսի 23-ին լրագրողների հետ հանդիպման ժամանակ ասել է Ռուսաստանի հայերի միության նախագահ Արա Աբրահամյանը։
Նա դժգոհություն է հայտնել Սփյուռքի նկատմամբ իշխանությունների վարած քաղաքականությունից եւ ասել, որ Հայաստանի վարչապետի հայտարարությունները Սփյուռքի միասնության մասին չեն համապատասխանում իրականությանը:
Նրա գնահատմամբ՝ մինչեւ Հայաստանի ներկայիս իշխանությունների գալը կապն ամուր է եղել եւ պետության հետ համատեղ ակտիվ աշխատանք է տարվել: «Սփյուռքը պառակտված է արդեն հինգ տարի։ Ռուսաստանում բացվել է մոտ 400 ազգային կազմակերպություն, որոնք ակտիվորեն քննադատում են մեր միությունը, իսկ հետո արագ փակվում»,-նշել է Աբրահամյանը։
Նա դժգոհություն է հայտնել ՄԱԿ-ի Անվտանգության խորհրդի նիստի արդյունքում բանաձեւի տեսքով արդյունքի բացակայության կապակցությամբ՝ քննադատելով իշխանություններին նախապատրաստական աշխատանքների բացակայության համար: «Բաքվի դեմ որեւէ պատժամիջոց չի կիրառվել, ոչ մի երկիր չի խոսել Լեռնային Ղարաբաղի ժողովրդի ինքնորոշման մասին։ Ինչո՞ւ չի խոսվում Նախիջեւանից վտարված հայերի մասին։ Այսօր մենք ուզում ենք Լեռնային Ղարաբաղի 120 հազար հայերին թողնել Ադրբեջանի կազմում, որտեղ հայատյացություն է քարոզվում։ Հայաստանում հաճախ են ասում՝ «Եկեք հանձնենք Ղարաբաղը եւ խաղաղություն ստանանք»։ Բայց հակառակը կլինի, ոչ մի հայ Լեռնային Ղարաբաղում չի մնա»,-ասել է նա։
Նրա խոսքով՝ Լեռնային Ղարաբաղը որպես Ադրբեջանի մաս ճանաչելը հանգեցրել է նրան, որ այսօր 120 հազար հայեր սովի են մատնված։
Աբրահամյանը համոզմունք է հայտնել, որ դա խիստ բացասաբար է անդրադառնում նաեւ հայ-ռուսական հարաբերությունների վրա։
Նա կարեւորել է բարեփոխումների իրականացումը։
Ռուսաստանի հայերի միության նախագահն ընդգծել է, որ Հայաստանում չկա բարենպաստ ներդրումային միջավայր, չկա համակարգված մոտեցում, որը թույլ կտա օգտվել Ռուսաստանից կապիտալի եւ աշխատուժի ներկայիս ներհոսքից:
Հետևեք մեզ Viber-ում
