Դավիթ Տոնոյանը հաստատեց Օնիկ Գասպարյանի հայտարարությունը (video)

ՀՀ ԳՇ նախկին պետ Օնիկ Գասպարյանը բազմից հայտարարել է, որ պատերազմի 3-րդ օրը Անվտանգության խորհրդի նիստում զեկուցել է, որ ԶՈՒ-ն պատրաստ չէ դիմակայել հակառակորդի ագրեսիան և պնդել է, որ անհրաժեշտ է կանգնեցնել քաղաքական միջոցներով։

Պաշտպանության նախկին նախարար Դավիթ Տոնոյանը ԱԺ քննիչ հանձնաժողովում հայտարարեց՝ քանի որ հիմա անցնում է դատական գործընթացներով, այդ մասով զգույշ պատասխաններ կտա.«Ես հաստատ հիշում եմ, որ այդպիսի խոսակցություն եղել է Անվտանգության խորհրդում։ Չգիտեմ՝ որ մասն է հրապարակել ԱԽ-ն։ Այդպիսի խոսակցություն եղել է նաև այլ ձևաչափերով և դրա վերաբերյալ առաջին զեկույցը ստացել եմ ես։ Դուր է եկել այդ զեկույցը ինձ, դուր չի եկել, բայց մենք պարտավոր էինք և՛ վարչապետին, և՛ ԱԽ-ին ներկայացնել մեր մոտեցումը և կար երրորդ կողմի անմիջական մասնակցությունը, որը մեզ համար տեսանելի էր։ Երրորդ կողմը, կարծում եմ, հասկանում եք, որ Թուրքիան էր։ Խնդրում եմ ուշադրություն դարձնել նրա վրա, որ այդ ներգրավումն իրականացվում էր, ոչ թե նախիջևանյան ուղղությամբ, այլ «ձիու քայլով»՝ արցախյան թատերաբեմում»։