Ես չեմ գնա «պուզատիի» եկեղեցի

«Առավոտ»-ի խմբագիր Արամ Աբրահամյանը գրել է. «Նախկին վարչապետ և պատգամավոր, մեր լավագույն տնտեսագետներից մեկը՝ Հրանտ Բագրատյանը, իր ֆեյսբուքյան էջում կրկնեց նախկինում արտահայտած իր թեզն այն մասին, որ Հայ Առաքելական եկեղեցին մեր ողջ պատմության ընթացքում խանգարել, խոչընդոտել է պետության զարգացմանը։ Դրան հետևել է Ազգային ժողովի փոխնախագահի՝ համենայնդեպս ձևով կոռեկտ պատասխանը, ինչպես նաև մեր հոգևորականների արձագանքները, որոնց մի մասը կոռեկտ էր, մի մասը՝ ոչ։ Այնուհետև «ֆեյսբուքյան պատժիչ բրիգադը» հարձակվեց Շարմազանովի վրա՝ ոչ այնքան Բագրատյանին և նրա գաղափարները պաշտպանելու, որքան «ընդդիմադիր լայքեր» հավաքելու մղումով։ Հոգևոր դաստիարակության նշանակությունն, անշուշտ, մեծ է, բայց պետական դպրոցներում այն պետք է սահմանափակվի համընդհանուր հումանիստական գաղափարներով, ոչ թե մեկ կրոնական ուղղության քարոզով։ Մնացածը հասարակական կառույցների խնդիրն է։ Եկեղեցիներ նույնպես, կարծում եմ, պետք են։ Ես, օրինակ, շատ կուզեի, որ այնտեղ, որտեղ ես եմ ապրում՝ Զովունիում, եկեղեցի լինի, որովհետև կարծում եմ, որ եկեղեցի գերադասելի է գալ ոտքով։ Բայց երբ պատկերացնում եմ, որ որևէ «պուզատի» իր, ենթադրենք, նախընտրական կամ որևէ այլ նմանատիպ շահերից ելնելով, կառուցելու է այդ եկեղեցին, իսկ հետո գովազդային ռեպորտաժներում մարդիկ բացականչելու են՝ «Ախ, մեծ բարերար», «Ախ ազգի նվիրյալ», հասկանում եմ, որ այդպիսի եկեղեցի ես չեմ գնա»։