Ողբերգական ավտովթար. քրեական հետախուզության բաժանմունքի 25-ամյա օպերլիազոր մահացել է. ՖՈՏՈՌԵՊՈՐՏԱԺ

Այսօր՝ սեպտեմբերի 16-ին, խոշոր ու ողբերգական ավտովթար է տեղի ունեցել Արագածոտնի մարզում։ Ժամը 10։40-ի սահմաններում Արագածոտնի մարզի Ագարակ գյուղի բնակիչ՝ 25-ամյա Լևոն Կարապետյանը Աշտարակ-Էջմիածին ավտոճանապարհի Սասունիկ գյուղի վարչական տարածքում իր վարած Mercedes մակնիշի 35 MՏ 445 համարանիշի ավտոմեքենայով դուրս է եկել ճանապարհի երթևեկելի գոտուց, բախվել բետոնե սյանը, այնուհետև մի քանի պտույտ գլխիվայր շրջվելով՝ հայտնվել ձորակում։ Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով վարորդ Լ. Կարապետյանը տեղում մահացել է։ Դեպքի վայր են ժամանել Ճանապարհային Ոստիկանության 2-րդ սպայական գումարտակի 1-ին վաշտի 1-ին դասակի ծառայողները՝ վաշտի հրամանատար Գագիկ Վարդանյանի, դասակի հրամանատար Արմեն Պողոսյանի գլխավորությամբ։ Ժամանել են նաև Ոստիկանության Արագածոտնի մարզային վարչության օպերատիվ խումբը՝ մարզի ոստիկանապետ, Ոստիկանության գնդապետ Լևոն Յազիչյանի գլխավորությամբ։ Մահացածի դին ավտոմեքենայից դուրս են բերել Արտակարգ իրավիճակների նախարարության Փրկարար ծառայության Աշտարակի թիվ 19 հրշեջ-փրկարարական ջոկատի հրշեջ-փրկարարները՝ խմբի պետ Կարեն Ղազարյանի գլխավորությամբ։ Մահացածի դին հատուկ տեխնիկայի միջոցով ավտոմեքենայից դուրս են բերել փրկարարները։ Վթարի մասին ՃՈ 1-77 կառավարման կենտրոնի պատասխանատու հերթապահ Գեղամ Մարգարյանը տեղեկությունը փոխանցել է Հայաստանի քննչական կոմիտեի Արագածոտնի մարզային քննչական վարչություն, որտեղից ժամանել են մեծ թվով քննիչներ՝ վարչության պետի ժամանակավոր պաշտոնակատար Գագիկ Առաքելյանի գլխավորությամբ։ Գ. Շամշյանի տեղեկություններով՝ մահացածն աշխատում էր Ոստիկանության Աշտարակի բաժնի քրեական հետախուզության բաժանմունքում՝ որպես օպերլիազոր, կոչումով Ոստիկանության ավագ լեյտենանտ էր։ Գ. Շամշյանը հայտնում է նաև, որ բախման հտևանքով մեքենայի գազաբալոնն էլ ավտոմեքենայից պոկվել և մոտ 50 մետր շպրտվել էր։ Օպերատիվորեն ժամանել են նաև Աշտարակի հիվանդանոցի հերթապահ խումբը։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով ահմանված կարգով` դատարանի` օրինական ուժի մեջ մտած դատավճռով: Լուսանկարները՝ Գագիկ Շամշյանի