Դեր Զորը վերադառնում է խաղաղ կյանքի. VOA

Դեր Զորի բնակչությունը փորձում է վերադառնալ խաղաղ կյանքին: Երկար ժամանակ քաղաքը գտնվում էր ԴԱԻՇ-ի վերահսկողության ներքո: Դաժան մարտերից հետո կառավարական ուժերը ազատագրեցին այն: Քաղաքում վերականգնվում են պետական մարմինները: Անվտանգության ուժերը շարունակում են քաղաքի շրջակայքը մաքրել ԴԱԻՇ-ի զինյալներից՝ վերջնականապես հեռացնելով ահաբեկչական խմբավորմանը այս տարածքներից: «Մեր նպատակն էր բացել ճանապարհը Պալմիրայից Դեր Զոր, և մենք դա արեցինք: Դժվար էր, սակայն սիրիական բանակը կարևոր ռազմավարական հաղթանակ տարավ»,- ասում է Դեր Զորի գործողության ղեկավար գեներալ Մոհամադ Խադուրը: Տեղի բնակչությունը լծվել է քաղաքի ճանապարհների մաքրման աշխատանքներին: Բանակը շարունակում է քաղաքին մատակարարել սնունդ, դեղորայք և այլ անհրաժեշտ պարագաներ: «Մենք աշխատավոր մարդիկ ենք ու երբեք չենք հոգնում: Մենք կօգնենք բանակին վերականգնել ճանապարհները»,- ասում է ճանապարհի մաքրմանը մասնակցող աշխատողներից մեկը: Քաղաքը աստիճանաբար վերակենդանանում է: Մարդկանց դեմքին կարելի է տեսնել ժպիտ: «Ո՛չ սնունդ կար, ո՛չ էլ խմելու ջուր: Ջուրը մատակարարում էին 4-5 օրը մեկ: Երբ սիրիական բանակը վերադարձավ, նրանք մեզ բերեցին ամեն ինչ՝ ներառյալ հաց, սնունդ ու ջուր»,- ասում է Դեր Զորի բնակիչ Սամիրը: Դեր Զորի կորուստը ևս մեկ հարված էր ԴԱԻՇ-ի դիրքերին Սիրիայում, որը աստիճանաբար կորցնում է իր վերահսկողության տակ գտնվող տարածքները: