Առաջինն Էրդողանը հիշեցրեց, թե երբ են Արցախից ՌԴ խաղաղապահները հեռանալու

Պաշտոնական Անկարան հակառուսական քայլերի արշավ շարունակվում է ողջ թափով, արդեն մի քանի օր: Երեկ արդեն հերթը հասավ նաև Արցախի շուրջ թեմային...

Թուրքիայի նախագահ Ռեջեփ Թայիփ Էրդողանը վստահություն է հայտնել, թե Ռուսաստանը 2025 թվականից հետո դուրս կգա Արցախի տարածքից։

Ռուսական խաղաղապահ առաքելությունը Արցախում՝ Լեռնային Ղարաբաղի Հանրապետությունում տեղակայվել է 2020 թվականի նոյեմբերին, տեղակայման ժամկետը 5 տարի է՝ հետագա 5 տարիներին երկարացվելու հնարավորությամբ՝ այն դեպքում, եթե կողմերից որևէ մեկը դեմ չէ դրան։

Այնուամենայնիվ, Էրդողանը շրջանցել է խաղաղապահների մանդատի երկարաձգման հնարավորությունն ամրագրող դրույթը։

«Համաձայն պայմանավորվածությունների՝ ռուս զինվորականները որոշ տարածքներում կմնան մինչև 2025 թվականը, իսկ դրանից հետո կլքեն այդ տարածքները։ Ես վստահ եմ, որ Ռուսաստանը կմնա հավատարիմ այդ պայմանավորվածություններին։ Իմ եղբայր Ադրբեջանի նախագահն Իլհամ Ալիևն հետևում է այս խնդրին»,- ասել է Էրդողանը՝ Վիլնյուսում տեղի ունեցած մամուլի ասուլիսի ժամանակ:

Այսինքն, ՆԱՏՕ-ի հավաքում Էրդողանը հանդես է եկել ընդդեմ Ռուսաստանի խաղաղապահ առաքելության` շտապելով: Չէ՞ ռուսական խաղաղապահ առաքելության ժամկետի վերաբերյալ կողմերից մեկը մինչև խաղաղապահ առաքելության ժամկետի լրանալը` 2025 թվականը, ավելի ճիշտ` վեց ամիս առաջ պետք է վերապահում հայտներ, որի հիմքով էլ 2025 թվականից հետո ռուսական խաղաղապահների առաքելությունը Արցախում կհամարվեր ավարտված:

Ուրեմն, Էրդողանն իրեն համարելով Հայաստան-Ադրբեջան խնդիրների կողմ, արդեն 2023 թվականին շտապում է ի լուր ՆԱՏՕ-ականների խոստանալ, որ Ռուսաստանը Լեռնային Ղարաբաղից դուրս է գալու:

Ավելին` Էրդողանը վստահություն է նույնիսկ հայտնում, թե Ռուսաստանը կմնա հավատարիմ պայմանավորվածություններին, այսինքն, Էրդողանն ու Պուտինը պայմանավորվե՞լ էին, որ ռուսները մինչև 2025 թվականն են մնալու Արցախում ու Պուտինը Էրդողանին այդ մասին վստահեցրել է:

Դե ինչ, Էրդողանը ընդդեմ Ռուսաստանի, ՆԱՏՕ-ի գագաթնաժողովի շրջանակներում արդեն որերորդ քայլն արեց:

Մնում է հարցական, օգոստոսին Պուտինը կմեկնի՞ Թուրքիա, ինչպես ռուս փորձագիտական հանրույթն է վերջին օրերին ասում` «Էրդողանի հասցրած դավաճանական քայլերից» հետո:

Մետաքսյա Շալունց