Ինչ է ակնարկում Միլսը. ինչպես ամրապնդել տնտեսական և առևտրային կապերը

2017 թ. սեպտեմբերի 13-ին Հայ-ամերիկյան առևտրային պալատի և Հայաստանում ԱՄՆ դեսպանության համատեղ ջանքերով Հայաստանում երկրորդ անգամ անկացվեց համաժողով՝ նվիրված Միացյալ Նահանգների «Արտոնությունների ընդհանրացված համակարգ» կամ GSP ռեժիմի հնարավորություններին, որոնցից կարող են օգտվել հայ գործարարները՝ Միացյալ Նահանգներ ապրանք արտահանելու համար: Հայաստանում ԱՄՆ դեսպան Ռիչարդ Միլսն այսօր կազմակերպված համաժողովի շրջանակներում լրագրողների հետ զրույցի ժամանակ նշեց, որ կարեւոր է, որ այստեղ ներկա են ԱՄՆ Առևտրի ներկայացուցիչները, ովքեր Հայաստան են ժամանել համաժողովին մասնակցելու համար։ Նա կարևորեց այն փաստը, որ բարձրաստիճան պաշտոնյաները այստեղ են, որպեսզի ներկայացնեն արտոնությունների ընդհանրացված համակարգի կամ GSP համակարգի ներքո առկա հնարավորությունները, որոնցից Հայաստանը կարող է օգտվել: «Իմ պաշտոնավարման երկու տարիների ընթացքում ինձ համար գերակա խնդիր է եղել տնտեսական և առևտրային կապերի ամրապնդումը մեր երկու երկրների միջև, և հենց այդ պատճառով շատ ուրախ եմ Հայաստանում հյուրընկալելու Միացյալ Նահանգների Առևտրի ներկայացուցչի գրասենյակի երկու բարձրաստիճան պաշտոնյաների: Մեր երկու այցելուներն այստեղ են խոսելու Միացյալ Նահանգների «Արտոնությունների ընդհանրացված համակարգի»՝ GSP ծրագրի մասին, որից կարող են օգտվել Հայաստանի գործարար շրջանակները»,- ասաց դեսպան Միլսը: Ինչպես ներկայացրեց՝  GSP ծրագիրը հնարավորություն է տալիս կոնկրետ երկրներից որոշակի ապրանքներ արտահանել Միացյալ Նահանգներ նվազեցված մաքսային վճարներով: Եվ Հայաստանի արտահանումների 60 տոկոսը մտնում է Միացյալ Նահանգներ GSP ծրագրի ներքո, մասնավորապես այնպիսի ապրանքներ, ինչպիսիք են ալյումինե փայլաթիթեղը, ոսկերչական իրերը, ջեմը և գյուղատնտեսական այլ արտադրանքներ: Հայաստանի հետ կրկնակի հարկումը բացառող պայմանագրի ստորագրման հնարավորությանն անդրադառնալով՝ դեսպանն ասաց, որ այդ հարցը Հայաստանի կառավարության կողմից բարձրացվել է։ «Մենք բազմիցս նշել ենք, որ նման համաձայնագրի ստորագրումը կդիտարկվի, եթե իսկապես անհրաժեշտություն առաջանա առևտրաշրջանառությունը խթանելու համար նման համաձայնագիր ունենալ»,- ասաց նա։ Անի Աղազարյան