Ի՞նչ են խոսել Նիկոլն ու Օնիկ Գասպարյանը (video)

Վարչապետ Նիկոլ Փաշինյանը 44-օրյա պատերազմի հանգամանքներն ուսումնասիրող քննիչ հանձնաժողովի նիստում այսօր պարզաբանեց, թե ինչու պատրեազմը կանգ առավ նոյեմբերի 9-ին։ Ըստ նրա՝ այս հարցում շրջադարձային դեր է խաղացել Շուշիի անկման գործընթացը։

Փաշինյանի խոսքով՝ Շուշիի անկման դրվագի հետ կապված քրեական գործեր են հարուցված ու հանգամանքները պետք է արժանանան մանրամասն պարզաբանման:

Նա ասաց, թե ԼՂ նախագահն ահազանգում էր Ստեփանակերտի խոցելի լինելու մասին։ Փաշինյանն ու Պուտինը նոյեմբերի 8-ին ու 9-ին ունեցել են շուրջ 20 հեռախոսազրույց։

«Նոյեմբերի 9-ի առավոտյան ստորագրեցի եռակողմ հայտարարության տեքստը։ Պարզվեց, որ Ադրբեջանը չի ստորագրում այդ տեքստն ու առաջ է քաշում մի շարք պահանջներ։ Օրվա ընթացքում անընդհատ տարբեր քննարկումներ էին, օրվա վերջում պարզվեց, որ տեքստին նոր լրացումներ են առաջարկվում, ինչը նշանակում էր, որ առավոտյան ստորագրված իմ տեքստն էլ ուժի մեջ չէ։ ՌԴ նախագահն ասաց, թե Ադրբեջանը տեքստում առաջարկում է ավելացնել Տավուշի մարզի անկլավների վերադարձի մասին կետ, ես ասացի՝ բացառվում է։ Հետո հանվեց այդ կետը, իսկ հետո լուրեր եկան մարտական գործողությունների ակտիվացման մասին ու որ Ստեփանակերտի երկնքում մեծ թվով ԱԹՍ-ներ կան։ Ի վերջո, ես ստորագրեցի փաստաթուղթը, որը ավելի վատն էր, քան առավոտյան ստորագրածը, բայց ավելի լավն էր, քան առաջարկվող մյուս տարբերակները, որոնցով մեկով նախատեսվում էր Մեղրիի միջանցք, մյուսով՝ Տավուշի անկլավների վերադարձ»,- մանրամասնեց ՀՀ վարչապետը։