Հայաստանն ունի միջուկային զենք արտադրելու գիտական պոտենցիալ
Այսօր՝ սեպտեմբերի 11-ին, ԱԺ նիստի ընթացքում կրթության և գիտության նախարարության գիտության պետական կոմիտեի նախագահ Սամվել Հարությունյանը նշեց, որ այսօր կան հայազգի մասնագետներ և երկրում և երկրից դուրս, ովքեր կարող են ցանկացած ժամանակ զբաղվել միջուկային զենք ստեղծելու խնդրով: ԱԺ-ում «Միջազգային գիտատեխնիկական կենտրոնի գործունեությունը շարունակելու մասին» համաձայնագիրը վավերացնելու մասին ՀՀ օրենքի նախագծի քննարկման ժամանակ ԱԺ պատգամավոր Նիկոլ Փաշինյանը հարց ուղղեց հիմնական զեկուցող` ՀՀ կրթության և գիտության նախարարության գիտության պետական կոմիտեի նախագահ Սամվել Հարությունյանին. «Հայաստանի Հանրապետությունում կա՞ միջուկային զենք արտադրելու գիտական պոտենցիալ, և կա՞ տեխնիկական պոտենցիալ նման խնդիրներ իրականացնելու համար»: Սամվել Հարությունյանն էլ ասաց, որ այսօր Հայաստանում բացակայում են տեխնիկական միջոցները նման խնդիրներ լուծելու համար, քանի որ դա բավականին լուրջ գումարներ է պահանջում, իսկ նման միջոցներ առայժմ չկան. «Սա բավականին լուրջ գումարներ է պահանջում և առայժմ մենք չունենք նման հնարավորություն»:
