Առեղծվածային ու արտակարգ դեպք Արմավիրի մարզում. լսվել է պայթյունի ձայն. տունն ամբողջովին վերածվել է ավերակի

«Shamshyan.com»-ը գրում է. Երեկ՝ սեպտեմբերի 9-ին, առեղծվածային ու արտակարգ դեպք է տեղի ունեցել Արմավիրի մարզում: Ժամը 18:00-ից 18:30-ն ընկած ժամանակահատվածում Խորոնք գյուղի Հովհաննես Շիրազի փողոցի թիվ 29 տանը, դեռևս անհայտ պատճառներով, ուժեղ պայթյուն է տեղի ունեցել: Ինչպես դեպքի վայրից հայտնում է ֆոտոլրագրող Գագիկ Շամշյանը, պայթյունի հեևանքով տանը տեղի է ունեցել փլուզումներ, պատերն ամբողջովին փլվել են, կոտրվել են պատուհանները, դռներն ու գույքը: Տան հյուրասենյակում այդ պահին եղել է 15-ամյա Արտակ Ամիրյանը, ով, բարեբախտաբար, չի տուժել: Տան ընտանիքի անդամները՝ 57-ամյա Քնարիկ Ամիրյանը, 37-ամյա Սամվել Ամիրրայնը, 34-ամյա Սուզաննա Գրիգորյանը, մանկասհասակ երեխաների՝ 14-ամյա Քնարիկ Ամիրյանի և 2 տարեկան Քրիստիկ Ամիրյանի հետ դաշտում գյուղատնտեսական աշխատանքներ անելիս են եղել: Թե ինչն է եղել պայթյունի պատճառը՝ ողջ գյուղի համար առեղծված է, իսկ վերջնական պատասխանը պարզ կլինի մի շարք փորձաքննություններ անելուց հետո: Ֆոտոլրագրողի հետ զրույցում տուժածների հարևաններն ասում էին. «Ընտանիքը հայտնվել է դրսում: Գիշերել են հարևանների տանը: Օրվա քրտինքով հաց վաստակողներ են: Խնդրում ենք պատկան մարմիններից, մասնավորապես՝ Արմավիրի մարզպետարանից, Ազգային ժողովի մեր պատգամավորից, որպեսզի հնարավորին սահմաններում օգնության ձեռք մեկնեն այս ընտանիքին: Հակառակ դեպքում՝ նրանք միայնակ ի վիճակի չեն զրոյից վերանորոգեն ավերակների վերածված տունը»: