Ո՞վ կլինի նոր պետը. կրթության տեսչության աշխատակիցները կծանուցվեն ազատումների մասին

Առաջիկայում գործունեությունը կսկսի կրթության և գիտության նախարարության կրթության տեսչական նորաստեղծ մարմինը, որը գործելու է կառավարության ենթակայությամբ: Տեսչական մարմնի ստեղծման որոշումն ընդգրկված է կառավրության սեպտեմբերի 7-ի նիստի օրակարգում: Որոշումն ուժի մեջ մտնելու պահից քառասունհինգօրյա ժամկետում վարչապետի հաստատմանը կներկայացվի կրթության և գիտության նախարարության կրթության տեսչական մարմնի կառավարման խորհրդի անհատական կազմը: Կրթության և գիտության նախարարին հանձնարարվել է՝ մեկամսյա ժամկետում ապահովել գործող կրթության պետական տեսչության աշխատողների աշխատանքային երաշխիքների պահպանմամբ սահմանված կարգով հնարավոր ազատումների մասին ծանուցելու գործընթացը: Տասնհինգօրյա ժամկետում ՀՀ կառավարության աշխատակազմ կներկայացվի տեսչական մարմնի բնականոն գործունեությունն ապահովող օրենսդրական փոփոխությունների փաթեթը: Ըստ այդմ՝ որոշումն ուժի մեջ մտնելուց հետո մեկամսյա ժամկետում կառավարության հաստատմանը կներկայացվի կրթության և գիտության նախարարության կրթության տեսչական մարմնին ամրացվող գույքի ցանկը։ Միաժամանակ տեսչական մարմնի կառավարման խորհրդի անհատական կազմի հաստատումից հետո մեկշաբաթյա ժամկետում ՀՀ վարչապետին կներկայացվի կրթության և գիտության նախարարության կրթության տեսչական մարմնի ղեկավարի թեկնածությունը: Տեսչական մարմնի ղեկավարին` նշանակումից հետո մեկշաբաթյա ժամկետում կրթության և գիտության նախարարի միջոցով վարչապետի հաստատմանը կներկայացվի կրթության տեսչական մարմնի աշխատողների թվաքանակը, որոնք լինելու են քաղաքացիական ծառայողներ: Նորաստեղծ տեսչական մարմինը առանձնացված ստորաբաժանում է, որն իրականացնելու է  վերահսկողական գործառույթներ, ինչպես նաև օրենքով սահմանված կարգով կիրառելու է պատասխանատվության միջոցներ կրթության բնագավառում: Նոր մարմնի ղեկավարի պաշտոնը հայեցողական է, նրան նշանակում և ազատում է վարչապետը: Տեսչական մարմինն ունենալու է պետ, երկու տեղակալ, երեք վարչություն, երեք  բաժին: Նշենք, որ համաձայն ԶԼՄ հրապարակումների՝ կրթության տեսչության պետ Արամ Կարապետյանը գտնվում է արձակուրդում և, ամենայն հավանականությամբ, արձակուրդից չի վերադառնա: Նրա նշանակումը տեսչական նոր մարմնի ղեկավարի պաշտոնում անհավանական է համարվում:   Արման  Վարդանյան