Գույքագրեք. վարչապետը՝ Քաղաքաշինության պետական կոմիտեի նախագահին ու մարզպետներին
ՀՀ վարչապետ Կարեն Կարապետյանն այսօր Կառավարության նիստի ժամանակ հանրապետության տարածքում գտնվող կիսակառույց ու անավարտ օբյեկտների վերաբերյալ հանձնարարական ներկայացրեց:
Վարչապետը նշեց, որ տարբեր բնակավայրերում, հատկապես, խոշոր քաղաքների քաղաքային միջավայրում գոյություն ունեն մասնավոր ընկերություններին պատկանող բազմաթիվ անավարտ շինություններ, տարիներ շարունակ շինարարություն չսկսված հողամասեր:
Վարչապետը հանձնարարեց այս օբյեկտների շրջակա միջավայրի վրա բացասական ազդեցությունից խուսափելու, հանրապետությունում տնտեսական զարգացման համար բարենպաստ պայմաններ ստեղծելու, կառուցապատման ներդրումային գործընթացը խթանելու, զբոսաշրջության համար ավելի գրավիչ միջավայր ձևավորելու համար Քաղաքաշինության պետական կոմիտեի նախագահին ու մարզպետներին՝ Երևանի քաղաքապետի հետ համատեղ մեկամսյա ժամկետում գույքագրել քաղաքաշինական գործունեության հատուկ կարգավորման տարածքներում, ՀՀ միջպետական և հանրապետական նշանակության ճանապարհների վրա ՀՀ քաղաքների կենտրոնական մասերում առկա բոլոր նմանատիպ շինություններն ու հողամասային տարածքները:
Նա հանձնարարեց երկուամսյա ժամկետում կառավարություն առաջարկներ ներկայացնել այդ շինությունների հետագա ճակատագրի վերաբերյալ` գործող օրենսդրությանը համապատասխան:
Հետևեք մեզ Viber-ում
