ՊՆ փոխնախարարը խոստովանեց․ թշնամին միայն Սոթքը չի թիրախավորել (video)
Իրադրությունն առաջնագծում հարաբերականորեն կայուն է: Այս մասին այսօր՝ ապրիլի 24-ին, Ծիծեռնակաբերդի հուշահամալիրում լրագրողների հետ զրույցում նշեց ՀՀ պաշտպանության փոխնախարար Արման Սարգսյանը:
«Միայն Սոթքը չեն թիրախավորում, եթե Սոթքում զոհ ենք ունեցել, դա չի նշանակում, որ միայն Սոթքն են թիրախավորում: Մեր սահմանագծում իրադրությունը հարաբերականորեն կայուն է: Նույն վիճակն է, եթե որևէ փոփոխության ենթարկվի, հանդես կգանք համապատասխան հայտարարությամբ»,- նշեց նա:
Հարցին՝ ի՞նչ վիճակ է Տեղ գյուղում, ադրբեջանական զորքերը հետ քաշվե՞լ են՝ փոխնախարարը պատասխանեց. «Տեղ գյուղի հետ կապված ամբողջ տեղեկատվությունը տրամադրվել է, եւ այդ հատվածում որեւէ փոփոխություն տեղի չի ունեցել: Որևէ փոփոխություն լինելու դեպքում տեղեկատվություն կտրամադրվի»:
Հարցին, թե կարո՞ղ ենք ասել, որ առնվազն Տեղի հատվածում սահմանազատման աշխատանքներ են իրականացվում, փոխնախարարն արձագանքեց. «Մեծ հաշվով սահմանազատման աշխատանքներն իրականացվում են համապատասխան միջգերատեսչական հանձնաժողովի կողմից, որը հենց սահմանազատման, սահմանագծման աշխատանքներով է զբաղվելու: Եվ սահմանապահներ կան այդ հատվածում, եւ ԶՈՒ ներկայացուցիչներ»:
Արման Սարգսյանն ասաց, թե վստահաբար չի կարող պնդել, որ Ադրբեջանը հող է նախապատրաստում նոր ագրեսիայի համար. «Բայց պետք է ամեն մեկս մեր տեղում ավելի զգոն լինենք ու ամեն ինչ անենք, որպեսզի յուրաքանչյուր ոք իր աշխատանքը կատարի որակով՝ և կահավորման, եւ ինժեներական, եւ ամրաշինական, եւ նաեւ մեր զորքերի մարտունակությունը բարձրացնելու ուղղությամբ համապատասխան աշխատանքներ տարվում են»,-ասաց նա:
Ինչ վերաբերում է նրան, որ ադրբեջանցիները անցակետ են դրել դեպի Արցախ ճանապարհին եւ վտանգված է 120 արցախցիների կյանքը, Արման Սարգսյանն ասաց. «Մենք պետք է անենք ամեն ինչ, որպեսզի հզորանանք, պետք է լինենք կուռ ու միասնական, լինենք արդիական բանակ ունեցող պետություն, որը կպարտադրի ենթադրյալ որևէ հակառակորդի սադրանքներ չհրահրել:
Աշխարհը պետք է չհանդուրժի որեւէ երկրորդ ցեղասպանություն: Օրվա խորհուրդը ավելի շատ հիշել, պահանջե, որ միջազգային հանրությունը ճիշտ ժամանակին ճիշտ արձագանքի եւ դրանով կանխվեն հետագա ոտնձգությունները», - ընդգծեց փոխնախարարը:
Հետևեք մեզ Viber-ում
