Դասեր չտա՛ք, զբաղվեք ձեր ինքնադաստիարակությամբ․ Սեյրան Օհանյանը՝ ՔՊ-ին ու Նիկոլին (video)
Պետք չէ բարձրանալ այս ամբիոն եւ փորձել դասեր տալ, շատ մարդիկ պետք է զբաղվեն ինքնադաստիարակությամբ: Այս մասին այսօր՝ ապրիլի 21-ին, ԱԺ-ում կառավարության 2022 թվականի գործունեության ծրագրի կատարողանի քննարկման ժամանակ ասաց ԱԺ «Հայաստան» խմբակցության ղեկավար Սեյրան Օհանյանը։
«133 տարվա պատմություն ունեցող կուսակցությանը գնահատական են տալիս մարդիկ, որոնք 133 ամսվա քաղաքական որևէ մի կենսագրություն չունեն, այս կամ այն կուսակցություններից դուրս պրծնելով՝ հանգրվանել են այսօր քաղաքական իշխանության այս թիմում»,- ասաց նա:
Ընդդիմադիր պատգամավորը նաև դատապարտեց երեկվա միջադեպը, երբ ամբիոնի մոտ քաղաքական ակցիա իրականացնող ընդդիմադիր պատգամավոր Թագուհի Թովմասյանին ու նրան միացած մյուս պատգամավորներին անվտանգության աշխատակիցները քաշքշելով հեռացնում էին։
Սեյրան Օհանյանը նշեց, որ շարունակական է դարձել այս իշխանությունների մոտ բռնությունների դեպքերը հատկապես կանանց նկատմամբ։
Խոսելով կառավարության իրականացրած քայլերի, գործողությունների մասին, Սեյրան Օհանյանն ասաց, որ այս իշխանության օրոք բանակցային գործընթացում բոլոր ձեռքբերումները տապալվել են, հասարակությունը մասնատվել է։
«Բանակն իր զարգացումն ապահովել էր տարածաշրջանում, հաղթանակած, մրցունակ բանակ է եղել, ի վիճակի էր պաշտպանել մեր հայրենիքը։ Բանակին թիկունք էր պետք կանգնել։ Ընդ որում ասեմ, որ այն ճեղքումը որը տեղի է ունեցել պատերազմի ժամանակ և այդ ուղղությամբ ադրբեջանական բանակը հասել է մինչև Շուշի ու Հայաստան, այդ ճեղքումը տեղի է ունեցել այն պատասխանատվության գոտում, որի հիմնական պատասխանատուն գերագույն գլխավոր հրամանատարն էր և իրենք պետք է ստեղծեին հրամանատարություն և պաշտպանությունը կազմակերպեին»,- ասաց ընդդիմադիր պատգամավորը։
Անդրադառնալով կառավարության ծրագրին՝ նա ընդգծեց, որ անվտանգության ոլորտը տապալված է, ինչը նշվում է նաև ծրագրում։
«2022 թվականի կառավարության ծրագիրը ձախողվել է»,- հայտարարեց Սեյրան Օհանյանը։
Հետևեք մեզ Viber-ում
