«Բիսետկի բազառ չի». վիճաբանություն ոստիկանների եւ Ֆիրդուսի բնակիչների միջեւ (video)

Կառավարության շենքի դիմաց, որտեղ այսօր՝ ապրիլի 20-ին, բողոքի ակցիա են իրականացնում Ֆիրդուսի թաղամասի բնակիչները, վիճաբանություն տեղի ունեցավ ակցիայի մասնակիցների եւ ոստիկանների միջեւ:

«Ես իմ ասելիքն ասացի՝ պահեք հասարակական կարգը, ես խորհուրդ չեմ տալիս, ես որպես ոստիկան զգուշացնում եմ: Ձեզ հետ էլ չեմ ուզում խոսել: Ծառայությունը այստեղ կազմակերպում եմ ես, խնդրում եմ կոռեկտ խոսացեք եւ չափի մեջ պահեք ձեզ»,-ասաց ոստիկաններից մեկը դիմելով ակցիայի մասնակիցներին:

Ակցիայի մասնակիցներից մեկն էլ արձագանքեց. «Իսկ ինչու եկաք սադրեցիք: Մենք ոչ մի կարգ չենք խախտել, որ բանը հասնի զգուշացնելուն: Զգուշացրու, տեսնենք՝ ոնց ես զգուշացնում: Էսքան ոստիկան կար, ինչո՞ւ եկաք լարվածություն մտցրեցիք: Մենք որեւէ խոչընդոտ ստեղծե՞լ ենք»:

Մեկ այլ ոստիկան էլ ասաց. «Բիսետկի բազառ չի, որ ասում եք՝ ինչի ես տենց ասում: Սա մեր պազիցիան է»:

Հիշեցնենք՝ Երևանի կենտրոնում գտնվող Ֆիրդուսի թաղամասն առաջին անգամ հանրային գերակա շահ հռչակվեց 2008 թվականին, նույն որոշումը վերահաստատվեց նաև 2018 թվականի մարտի 22-ին` «թավշյա հեղափոխությունից» մեկ ամիս առաջ:

2015 թվականին, կառավարությունը, ելնելով գերակա հանրային շահից, որոշել է քանդել «Ֆիրդուսի» թաղամասի մի քանի տներ և պահեստներ։ Բնակիչների մեծ մասը փոխհատուցում է ստացել, սակայն կան բնակիչներ, որոնք փոխհատուցման չափը համարում են անհամաչափ և չեն լքում իրենց տները։

Թաղամասի կառուցապատումը նախատեսվում է ավարտել 2023-2024 թվականներին: Ըստ կառուցապատման նախագծի՝ Ֆիրդուսի նոր թաղամասում լինելու են ինչպես բնակելի շենքեր, այնպես էլ հյուրանոցներ ու բիզնես կենտրոններ: