Աշխարհը սպասում է ամռան հարձակմանը

Հակահարձակումը կարող է սկսվել արդեն այս ամառ

Ուկրաինական բանակի հակահարձակումը կարող է սկսվել արդեն այս ամառ, հայտարարել է երկրի վարչապետ Դենիս Շմիհալը (Շմիգալ) Վաշինգտոն այցի կապակցությամբ The Hill-ին տված հարցազրույցում: Շմիհալը Վաշինգտոն է ժամանել երեկ։

«Մեր բոլոր ընկերներն ու գործընկերները հստակ հասկանում են, որ հակահարձակման անցնելու համար պետք է 100 տոկոսով պատրաստ լինել դրան և նույնիսկ ավելին», - ըստ «Ազատության», ասել է նա։ Հարցին, թե ինչպես են ամերիկյան գաղտնի փաստաթղթերի վերջին արտահոսքերն ազդում հակահարձակման պլանավորման վրա, Շմիհալն արձագանքել է, թե Ուկրաինան ամեն դեպքում կազատի իր տարածքները։ «Մենք բազմիցս ապացուցել ենք, որ կարող ենք դա անել: Մենք մեր գործընկերներից ամբողջ աշխարհում […] խնդրում ենք տանկեր, զինամթերք, ինքնաթիռներ և զրահատեխնիկա», - նշել է նա:

CNN. «Գաղտնի փաստաթղթերի արտահոսքից հետո Ուկրաինան փոխել է հակահարձակման պլանը»

«Պենտագոնից հույժ գաղտնի փաստաթղթերի արտահոսքից հետո Ուկրաինան ստիպված է եղել մասնակիորեն փոխել լայնորեն գովազդվող հակահարձակման պլանը», - երեկ հաղորդեց CNN հեռուստաընկերությունը՝ վկայակոչելով Վլադիմիր Զելենսկուն մոտ կանգնած աղբյուրներից մեկը։ «Գաղտնի» և «Հույժ գաղտնի» մակագրություններով հարյուրավոր փաստաթղթերի արտահոսքը տեղի էր ունեցել անցած շաբաթավերջին, դրանք տեղադրվել էին Discord սոցիալական ցանցում։ Փաստաթղթերի զգալի մասը վերաբերում է ռուս-ուկրաինական պատերազմին, ինչպես նաև Վաշինգտոնի և դաշնակից պետությունների հարաբերություններին։ «Ամերիկացի պաշտոնյաները վստահ են, որ գաղտնազերծված փաստաթղթերի մեծ մասը իրական են», - պնդում է Reuters գործակալությունը։

Օգոստոսի վերջին Կիևը կկարողանա ազատագրել Ղրիմը՝ պայմանով, ասում է ամերիկացի գեներալը

Ընթացիկ տարվա օգոստոսի վերջին ուկրաինական զորքերը կկարողանան ազատագրել Ռուսաստանի կողմից բռնակցված Ղրիմ թերակղզին՝ պայմանով, որ Արևմուտքը Կիևին կտրամադրի հեռահար ճշգրիտ զենք։ Ըստ «Ազատության», նման կարծիք է հայտնել Եվրոպայում ԱՄՆ ուժերի նախկին հրամանատար, պաշտոնաթող գեներալ-լեյտենանտ Բեն Հոջեսը Deutsche Welle-ին տված հարցազրույցում։ «Կարծում եմ, որ Ուկրաինայի գլխավոր շտաբը շատ լավ նախապատրաստվել է հակահարձակման: Կարծում եմ, մենք կտեսնենք շատ պրոֆեսիոնալ հարձակողական գործողություններ, շատ արդյունավետ, և դրա նպատակը կլինի մեկուսացնել Ղրիմը և պայմաններ ստեղծել թերակղզու հնարավոր ազատման համար այս տարվա վերջին», - ասել է Հոջեսը։

Պատասխանելով DW-ի պարզաբանող հարցին, թե արդյոք նա այսօր էլ պնդում է իր նախկին կանխատեսումը, որ Ուկրաինայի զինված ուժերը կկարողանան Ղրիմ հասնել ամռանը, Եվրոպայում ԱՄՆ ուժերի նախկին հրամանատարը նշել է. - «Այո, բայց մինչև օգոստոսի վերջ։ Նրանք կկարողանան ազատագրել Ղրիմը, եթե, և ես միշտ այդ վերապահումն արել եմ, եթե մենք նրանց տրամադրենք հեռահար ճշգրիտ զենքեր, որոնք անհրաժեշտ են դա անելու համար, այո, նրանք, անշուշտ, կարող են դա անել»:

Հարցազրույցում ավելի վաղ գնահատելով Ռուսաստանի զինված ուժերի հարձակողական ներուժը՝ Բեն Հոջեսը պնդել է, թե զենքը, «որը Ռուսաստանը հիմա դուրս է բերում պահեստներից, շատ հին է՝ մոտ 65 տարեկան»։ «Ռուսաստանը հարձակման այլ հնարավորություններ չունի, նոր հարձակման անցնելու համար ռուսները զենք չունեն», - ընդգծել է ամերիկացի գեներալը, հավելելով, թե իր կարծիքով՝ ստեղծված պայմաններում Ռուսաստանի զինված ուժերն անցնելու են պաշտպանական դիրքի՝ փորձելով «պահել այն, ինչ ունեն»:

Ուկրաինական հակահարձակման ժամկետը չի հայտարարվել, պաշտպանության նախարար Ալեքսեյ Ռեզնիկովը երեկ ասել է, թե Կիևը շտապելու կարիք չունի: «Ռուսաստանի «սողացող» հարձակումն ուկրաինական ճակատում գնալով ավելի է բարդանում, տապալվում են առնվազն Դոնեցկի և Լուգանսկի շրջանները գրավելու ծրագրերը, իսկ հսկայական կորուստները նվազեցնում են ռուսական բանակի ներուժը։

Այսօր ժամանակն Ուկրաինայի դաշնակիցն է, մենք հնարավորություն ունենք լավագույնս նախապատրաստվելու հակահարձակմանը», - ասել է Ռեզնիկովը լիտվական մեդիային տված հարցազրույցում:

Ուկրաինայի դաշնակիցները վերահաստատում են, որ ամեն կերպ նպաստելու են Ուկրաինայի հակահարձակման հաջողությանը

Լեհաստանի կողմից Leopard 2 տանկերի փոխանցումը Ուկրաինային
Ռուսաստանի դեմ պատժամիջոցները դեռ երկար են գործելու, Տուլայում 2 շաբաթ առաջ հայտարարեց Ռուսաստանի նախագահը։ «Մենք բոլորս հասկանում ենք, որ պատժամիջոցները, իհարկե, երկարաժամկետ են։ Մեզ անհրաժեշտ են երկրի ինքնիշխան զարգացման ռազմավարական նպատակներին ուղղված միջնաժամկետ և երկարաժամկետ բարեփոխումներ», - ասել է Վլադիմիր Պուտինը։

Ռուսաստանի դեմ աննախադեպ կոշտ պատժամիջոցները Արևմուտքը սահմանել է Ուկրաիա ներխուժումից հետո։ Մոսկվան պարբերաբար կրկնում է, որ չնայած այդ պատժամիջոցներին, երկրի տնտեսությունը նորմալ զարգանում է, և Ռուսաստանը շարունակելու է այսպես կոչված հատուկ ռազմական օպերացիան Ուկրաինայում։

Մինչ այդ, ՄԱԿ-ի մանկական հիմնադրամի (ՅՈՒՆԻՍԵՖ) տվյալներով, պատերազմի տասներեք ամիսներին ընթացքում Ուկրաինայում առնվազն 501 երեխա է մահացել։ Ընդ որում, խոսքը միայն ՄԱԿ-ի կողմից հաստատված զոհերի մասին է, իրական թվերը, ամենայն հավանականությամբ, շատ ավելի մեծ են։ Մինչդեռ պատերազմը շարունակվում է, և հայտնի չէ, թե դեռ քանի երեխայի կյանք կխլի։

Պատերազմի ուսումնասիրման ինստիտուտը հաստատում է ռուսական լրատվամիջոցներում հրապարակված տեղեկությունն այն մասին, որ «Վագներ» ռազմական մասնավոր ընկերությունը գրավել է Բախմուտի քաղաքապետարանը։

Նախօրեին տեսանյութ էր հրապարակվել, որում ավերված քաղաքապետարանի փլատակների վրա տեղադրված է ռուսական դրոշ։ Ամերիկացի փորձագետների տվյալներով, վարձկանները շարունակում են շարժվել դեպի քաղաքի կենտրոն և շուտով կփորձեն իրենց վերահսկողության տակ վերցնել քաղաքի կենտրոնն ու արևմտյան հատվածը, որտեղ այժմ գտնվում են ուկրաինացի զինվորականների դիրքերը։
Դոնբասում կատաղի մարտերին զուգահեռ, ուկրաինական կողմը պատրաստվում է հակահարձակման, իսկ Ուկրաինայի դաշնակիցները շարունակում են պնդել, թե ամեն ինչ անելու են, որ այդ հակահարձակումը հաջողված լինի։

ՆԱՏՕ-ի դաշնակիցները ուզում են, որ ուկրաինական զորքերը հետ շպրտեն նախագահ Պուտինի զինվորներին. Ստոլտենբերգ

«Ազատության» ուկրաինական ծառայությանը տված հարցազրույցում ՆԱՏՕ-ի գլխավոր քարտուղար Յենս Ստոլտենբերգը հայտարարել է, թե ՆԱՏՕ-ի դաշնակիցները ուզում են, որ ուկրաինական զորքերը հետ շպրտեն նախագահ Պուտինի զինվորներին։ Միայն դա, նրա կարծիքով, կարող է պայմաններ ստեղծել Ուկրաինայի և Ռուսաստանի միջև ապագա խաղաղ բանակցությունների համար։ Ստոլտնեբերգը շեշտել է, որ այն, թե երբ և ինչ պայմաններում կարող են սկսվել նման բանակցությունները, Կիևը պետք է որոշի, և ՆԱՏՕ-ն պետք է պատրաստ լինի օգնել Ուկրաինային այնքան, որքան անհրաժեշտ է. - «Հիմնական մարտահրավերը, իհարկե, այն է, որ այս պատերազմն այժմ վերածվել է քայքայման պատերազմի: Սա նշանակում է, որ այժմ տեղի է ունենում նյութատեխնիկական ապահովման կռիվ, այսօր կարևոր է ապահովել զինամթերքի, զենքի մատակարարումը։ Մենք պետք է աջակցենք Ուկրաինային, քանի որ մեր անվտանգության շահերից է բխում ցույց տալ, որ նախագահ Պուտինը չի հաղթում Ուկրաինայում»։

Ստոլտենբերգը համոզված է, որ պետք է ամեն ինչ անել, որպեսզի Ուկրաինան հաջողության հասնի մարտի դաշտում, ինչը հաջողություն կբերի նաև բանակցությունների սեղանի շուրջ։ Իսկ հաջողությունը նաև կախված է լինելու զինամթերքից, որն Ուկրաինան այսօր ստանում է Արևմուտքից։

Միևնույն ժամանակ, Կիևը պնդում է, թե Ուկրաինայի անվտանգությունը լավագույնս պաշտպանված կլինի, եթե Ուկրաինան դառնա ՆԱՏՕ-ի անդամ։ Այսօր Բրյուսելում կայացած Ուկրաինա - ՆԱՏՕ հանձնաժողովի նիստից հետո այս մասին կրկին հայտարարել է արտգործնախարար Դմիտրի Կուլեբան։ Հյուսիսատլանտյան դաշինքին Ուկրաինայի անդամակցությունը, սակայն, դեռ օրակարգում չէ։

Մետաքսյա Շալունց