«Արմավիրի մարզպետը և մարզպետարանի ներկայացուցիչը օրենքի կոպիտ խախտում են թույլ տվել».ՀՀ ԿԳՆ հանրակրթության վարչության պետ

ՀՀ ԿԳՆ հանրակրթության վարչության պետ Աշոտ Արշակյանը Hayeli.am-ի խնդրանքով անդրադարձավ Արմավիրի մարզի Արտաշար գյուղի միջնակարգ դպրոցում տեղի ունեցած տնօրենի ընտրությանը, որը տապալվել է:Hayeli.am-ն այսօր գրել էր, որ Արտաշար գյուղի միջնակարգ դպրոցի տնօրենի ընտրությունը հերթական անգամ տապալվել է: Պատճառն այն է, որ մարզպետ Աշոտ Ղահրամանյանն այս դպրոցում ունի սեփական թեկնածու, իսկ գյուղն ու դպրոցը տնօրենի պաշտոնում ուզում են տեսնել իրենց նախկին տնօրեն Հասմիկ Սրապիոնյանին: Այս փաստը մեզ հետ զրույցում ներկայացրել էր նախկին տնօրեն Հասմիկ Սրապիոնյանը: Օգոստոսի 28-ին նախատեսված մրցույթը չի կայացել քվորում չլինելու պատճառով: Հասմիկ Սրապիոնյանի հետ մարզպետի կնքած պայմանագրի ժամկետը լրացել է 2016թ. նոյեմբերի 15-ին: Տնօրենի ընտրության կարգի համաձայն ՝ դպրոցի կառավարման խորհուրդը եռամսյա ժամկետում պետք է կազմակերպի և անցկացնի տնօրենի պաշտոնի թափուր տեղի համար մրցույթ: Ըստ դպրոցի կառավարման խորհրդի որոշման՝ 2017-ի հունվարի 20-ին  նշանակվել է մրցույթի օրը, որը, սակայն, ինչպես և օգոստոսի 28-ի մրցույթը, չի կայացել  քվորում չլինելու պատճառով: Այն ժամանակ մրցույթին չէին ներկայացել կառավարման խորհրդում ընդգրկված ՝մարզպետարանի և ԿԳՆ ներկայացուցիչները, իսկ այս անգամ չեն ներկայացել մանկավարժական խորհրդի երկու ներկայացուցիչները, երկու ծնողները և գյուղապետարանի ներկայացուցիչը: Մեր տեղեկություններով ՝ծնողները անապահովության համակարգում ընդգրկված նպաստառուներ են, նրանց նկատմամբ, ըստ ամենայնի, գործի է դրվել նպաստից զրկելու լծակը, իսկ գյուղապետարանի ներկայացուցչի դեպքում կիրառվել է սպառնալիքը: Այս հոդվածը հրապարակվելուց  հետո Արմավիրի  մարզպետարանը  գրավոր ներկայացրեց պարզաբանում, ըստ որի ՝ ՀՀ Արմավիրի մարզպետարանի ներկայացուցիչ և խորհրդի նախագահ Արտակ Առաքելյանը  մրցույթին չի ներկայացել, քանի որ եղել է երկարատև արձակուրդի մեջ և առողջական խնդիրներով պայմանավորված ՝ երկրից բացակայելու պատճառով խնդրել է դադարեցնել դպրոցի կառավարման խորհրդի կազմում իր անդամակցությունը: Այդ հանգամաքով պայմանավորված` ՀՀ Արմավիրի մարզպետի համապատասխան որոշմամբ ՝ խորհրդի կազմում կատարվել է փոփոխություն ,և խորհրդի նոր անդամ է նշանակվել Գևորգ Մուրադյանը: Hayeli.am-ը,այս հարցի հետ կապված,պարզաբանում խնդրեց ՀՀ ԿԳՆ հանրակրթության վարչության պետ  Աշոտ Արշակյանից.վերջինս, հղում անելով հանրակրթության մասին  օրենքի 11-րդ հոդվածի 4-րդ  մասին, տեղեկացրեց, որ տեղի է ունեցել օրենքի կոպիտ խախտում ՝ մարզպետարանի աշխատակիցների կողից: Սույն հոդվածի 3-րդ մասի 1-4 կետով սահմանված  հիմքերով ՝ չեն կարող դադարեցվել խորհրդի անդամի լիազորությունները տնօրենի պաշտոնի թափուր տեղի համար հայտարարված մրցույթի օրվանից մինչև տվյալ մրցույթի ավարտը։Հանրակրթության վարչության պետը ասաց,որ օրենքի համաձայն՝ խորհրդի անդամի փոփոխություն չի թույլատրվում, քանի  դեռ մրցույթը չի ավարտվել: Մեր հարցին, թե ԿԳ նախարարության հանրակրթության վարչությունն ինչ է պատրաստվում անել այս հարցի առնչությամբ, պարոն Արշակյանը պատասխանեց, որ  կհանձնարարվի  կրթության տեսչությանը ստուգումներ անցկացնել  մարզպետարանի համապատասխան ստորաբաժանման կողմից դպրոցի կառավարման խորհդին առնչվող պաշտոնական գրագրության մեջ,  մասնավորապես ուշադրության կենտրոնում պահելով  խորհդի ձևավորման հրամաններն ու փաստաթղթերը: Արշակյանի հավաստմամբ ՝ խախտումներ արձանագրելու դեպքում մեղավորները  կենթարկվեն  պատասխանատվության։